Тӱнямбал экономике форум
Инвестиций ешаралтеш
«Систем Электрик» россий компаний дене социальный да экономике кыл кучымашым вияҥдыме нерген у соглашенийым пеҥгыдемдыме.
Соглашений почеш Козьмодемьянскысе «Потенциал» заводым вияҥдымашке ты компаний ешартыш инвестицийым пышта.
Марий Эл правительстве ден «Систем Электрик» АО коклаште ончыч ыштыме соглашений дене келшышын, 2022-2024 ийлаште «Потенциал» ООО-лан 1,5 миллиард теҥге инвестиций ойыралтын, тидын шотыштак кодшо ийын гына – 618 миллион теҥге, палемден Юрий Зайцев. Санденак ӱмаште продукцийымат 30 процентлан утларак ыштен лукмо. Завод Российыште да СНГ эллаште розетке ден чӱктыш-йӧртышым эн шуко ямдыла.
«Систем Электрик» АО-н генеральный директоржо Алексей Кашаевын ойлымыж почеш, ончыкыжо изделий ассортиментым кумдаҥдаш, производство базым вияҥдаш, инженерный системым уэмдаш, у технологийым шыҥдараш палемдалтеш. Тений ты пашалан 600 миллион наре теҥге колталтеш.
Марий Эл вуйлатышын пресс-службыжын уверже негызеш Юрий Исаков ямдылен.
Снимкыште: «Систем Электрик» АО дене кыл вияҥеш.
Денис Речкинын фотожо.
