Кугу Отечественный сарыште сеҥымылан тений – 81 ий. Тиде шучко сареш мочол еҥын ӱмыржӧ кӱрылтын, мочол йоча индыралтын, орланен, ача-ава деч посна кушкын?!
Тушман ваштареш лӱдде кредалше да сеҥымашым лишемдаш полшышо ветеран-шамычат, тылыште тыршыше-влакат ий еда шагалрак кодыт.
Йолташ-влак, тендан тукымыштыда але палымыда-влак кокла гыч кӧ сарыште лийын? Сар корным эртымыштым паледа мо? «Курымашлык полк» акцийыш ушнеда? Сеҥымаш кечым кузе палемдеда?
Артём ИРКАБАЕВ, Марий самырык театрын артистше:
– 9 Май – мемнан ешлан кугу пайрем. Кугу Отечественный сарыште кугезе кочам Илья Николаевич Иркабаев лийын. Садлан кажне ийын Сеҥымаш кечын Йошкар-Олаште эртаралтше парадым ончаш лектына. Тушко миен, ветеран- влакым саламлена да элнан вийжылан куанена.
Аркадий КУРОЧКИН, военный службын ветеранже:
– Мыйын ачам, Максим Петрович Курочкин, 1940 ий 16 сентябрь гыч 1946 ий марте сарыште лийын. Артиллерист лийын. 1942 ий 5 июньышто Ленинград воктенысе Тихвин ола воктене кредалмаште чот сусырген да октябрь марте госпитальыште эмлалтын. Варажым тудым самолёт-влакым обслуживатлыше батальоныш колтеныт. Сеҥымаш кечым Будапешт олаште вашлийын. 1946 ий марте службым эртен. Чолгалыкым да лӱддымылыкым ончыктымыжлан ачам шуко медаль дене палемдалтын: «За оборону Советского Заполярья», «За боевые заслуги», «За отвагу», «За победу над Германией в Великой Отечественной войне 1941-1945гг.». Еш альбомыштына сар пагытыште ыштыме ятыр фотокартычкыже аралалтеш.
Сар деч вара «Йошкар Октябрь» колхозын председательжылан сайленыт, ик жап парткомын секретарьже лийын. Тазалыкше начареммылан кӧра лесниклан куснен да сулен налме канышыш лекмешкыже тыршен.
9 Майлан ешем да йолташем-влак дене «Курымашлык полк» акцийыш ушнена.
Жап эрта, а шарнымаш курымеш илаш тӱҥалеш.
Элина КОЛЬЦОВА, «Тумывий» мурышо да куштышо ансамбльым вуйлатыше (Моско ола):
– Сеҥымаш кече – шинчымаш йӧршан пайрем. Тукымыштем сарыште лийше-влак улыт. Ешна дене нуным эреак порын шарнена. Кугезе кочам Пётр Иванович Рыбаков Морко район Тойметсола ялыште шочын, ешым поген. Кугу Ачамланде сарыш 1942 ий 9 мартыште Морко военкомат гыч каен. Тиде ийынак 10 октябрьыште военкоматыш серыш толын. Тушто рядовой, красноармеец Пётр Иванович Рыбаков Смоленский областьыште увер деч посна йомын манын возымо.
Чӱчӱм Алексей Алистарович Рыбаков – прапорщик. Тудо 2025 ий сентябрьыште чон кӱштымӧ почеш специальный военный операцийыш элнам аралаш каен. Ноябрьыште боевой заданий гыч толын огыл, увер деч посна йомын. Йӧратыме айдемым курымешлан йомдараш моткоч йӧсӧ.
Пелашемат 2023-2024 ийлаште спецоперацийыште добровольческий формированийыште лийын. Сусыргымо деч вара мӧҥгӧ пӧртылын.
«Курымашлык полк» акцийыш школышто тунемше шольо-шӱжарна-влак кажне ийын кугезе коча-кован фотосӱретышт дене ушнат. А мый ты кечын Сеҥымаш парадым телевизор дене ончем да тӱрлӧ ончерыш, мероприятийыш миен толаш тыршем. Тидымат палемдыман: ӱмаште куштышо да мурышо «Тумывий» ансамбль дене «Ме тиде шошым вученна» калыкле мюзиклым шынденна. Чоным пудыратыше, келгын шонаш таратыше постановко мемнан талешкына-влакым шарнымылан пӧлеклалтын.
Алевтина БАЙКОВА ямдылен
Фотом еш альбом гыч налме
