«Мастарлыкышт ешаралтеш»
5-7 июльышто Чебоксарыште куштылго атлетике дене Российын чемпионатше ден первенствыже эртеныт. Тушто коло ияш марте ӱдыр-рвезе-влак вийыштым тергеныт.
Марий Элын чапшым спорт мастерыш кандидат-шамыч Егор Кузнецов ден Андрей Мошкин араленыт. Нуным тренер К.Лукьянов тренироватла.
Кум тӱжем метр кужытышто чаракым сеҥен куржмаште Андрей визымше верым налын гын, 800 метрыште Егор 27-ше лийын.
— Рвезе-влак ты стартлан ончылгоч ямдылалтыныт, но теве тидымат шотыш налман: Мошкин тыгай кужытым чаракым сеҥен куржмаште, поснак вӱданым (стипль-чез) кокымшо гана веле куржын. Тудлан визымше верым сай семын шотлыман. Опытым погат, мастарлыкыштым ешарат, — умылтара тренерышт Константин Петрович. – А Егорын тӱшкаштыже 53 еҥ лийын. Коктынат тыршыше улыт, сандене результатышт дене куандараш тӱҥалыт манын ӱшанена. Кызыт изиш каналтат (рушлаже восстановительный жап). Теве снегым погена. Тидат организмлан пеш сай витамин, а августышто у тургым тӱҥалеш. Ончыч республикыште кроссышто, а вара Оренбургышто Российын первенствыштыже вийыштым тергаш ямдылалтыт.
Рвезе-влаклан, тыгак тренерлан сай результатым, пайдале кеҥеж канышым тыланена.
Е.Эшкинина.
