«Самырык профессионал-влак («WorldSkills Russia») Национальный чемпионатын X финалже кӱкшытыштӧ эртыше иктешлыше таҥасымашлаште (нуныжо элна мучко тӱрлӧ регионышто эртат) Марий Эл гыч студент-влак моштымашым ончыктат да сеҥымашышт дене куандарат.
Профессионализмлан икымше медальоным мемнан республикылан Хант-Манси автономный округыш пурышо Сургут олаште эртыше таҥасымаш гыч Йошкар-Оласе строительно-промышленный колледжын студенткыже Ирина Михайлова конден. Тудо «Кондитер паша» компетенцийыште моштымашыжым терген да призан верыш лектын.
А теве Марий радиомеханический техникумын студенткыже Валерия Дюкова тыгаяк награде дене «Финанс» компетенцийыште сеҥен налын. Таҥасымаш Ярославль областьыште эртен.
Эртыше кечылаштак Бауман лицейыште тунемше да тыгодымак Йошкар-Оласе строительный техникумышто каменщик профессийлан ямдылалтше Михаил Козицын Йӱдвел Осетий-Аланийыште эртыше таҥасымаште «Кермычым оптымаш – юниор-влак» компетенцийыште профессионализмлан медальоным сеҥен налын.
Нылымше тыгаяк награде дене Магаданыште эртыше «Самырык профессионал-влак» таҥасымаш гыч Марий радиомеханический техникумын студенткыже Ксения Крылова палемдалтын.
Визымше медальоным Транспортно-энергетический техникумын студентше
Хабибулло Назаров сеҥен налын. Йӱдвел Осетий-Аланийыште эртаралтше таҥасымашыште рвезе «Кермычым оптымаш» компетенцийыште мастарлыкым ончыктен да ойыртемалтын.
Г.Кожевникова
Снимкыште: транспортно-энергетический техникумын студентше Хабибулло Назаров.
Фотом Марий Эл Образований да науко министерстве гыч налме.
