Марий Элысе сонарлыме озанлыклаште маска чотым рашемдыме паша тӱҥалын.
Тидын нерген республикысе Янлык тӱня департамент увертара. Нуным шотлаш кызыт жап келшен толшо, маска-влак тӱжваке лектыныт. Тӱҥ шотышто нуным фотоловушкыш логалмышт, лавыраште, чодырасе корнылаште, ошмаште кодымо кышашт почеш шотлат. Пытартыш жапыште маска-шамыч чодыра пашаеҥ-влакын нуным пукшаш вераҥдыме верлашкат лӱдде лектыт. А кочкытшо емыжым, пӱкшым, тумлегым, мӱйым, шӱльым, тӱрлӧ кушкылым. Специалист-влакын ойлымышт почеш, маска шордо ӱмбакат кержалт кертеш. Но тыге утларакше шала коштшо маска гына ышта.
Кодшо ийысе учёт почеш республикыште 1 тӱжем лишке маска улмаш.
С.Носова
Снимкыште: фотоловушкыш маска-влак логалыныт.
Фотом Департаментын лаштыкше гыч налме.
