15 июльышто У Торъял посёлкышто еш да родо-тукым фольклор ансамбль-влакын усталыкыштым ончыктышо «Творцы и хранители» фестиваль кудымшо гана эртен.
Тушко Марий Элын индеш да Чуваш Республикын кок районышт гыч 30 наре усталык коллектив ушнен.
Фестиваль еш усталыкым арален да вияҥден колташ, йоча-влак калыкнан йӱлаж ден тӱвыражым пален кушкышт, еш да родо-тукым фольклор ансамбль-влакын сеҥымашышт нерген утларак пален налаш йӧным ышта.
Фестивальыште участник-влакын пашаштым жюри аклен.
«Эн сай еш фольклор ансамбль» номинацийыште икымше степенян лауреат лӱм дене Чуваш Республик гыч «Шурӑмпус» фольклор ансамбль ден «Хунав» еш коллектив, тыгак У Торъял район гыч совлам перкалыше-влакын ансамбльышт да Медведево район Пӱкшерме тӱвыра пӧрт пеленысе «Весела кумыл» фольклор ансамбль палемдалтыныт. Кокымшо степенян лауреат лӱмым Звенигово район Юлъял тӱвыра пӧртын «Маска тавраш» еш коллективше, а кумшым У Торъял район гыч Садовинмыт еш ден «ЛИНКС» куштышо коллектив налыныт.
«Кидпашам ыштыше эн сай тукым кыл» номинацийыште Морко район Унчо гыч «Порсын кумыл» усталык мастерской ден У Торъял район гыч Домрачевмыт-Мосуновмыт еш икымше степенян лауреат лӱм дене палемдалтыныт. Кокымшо степенян лауреат лӱмым «Шурӑмпус» ден «Маска тавраш», а кумшым Стрельниковмыт-Кудрявцевмыт еш (Медведево район) ден Якимовмыт еш (У Торъял район) налыныт.
«Йоча да кугезе тукым» эн сай фотовыставке» номинацийыште икымше степенян лауреат лӱм дене «Маска тавраш» ден Яметовмыт еш (У Торъял район), кокымшо дене «Лепет тукым» еш коллектив (Кужэҥер район) ден Рябининмыт еш (У Торъял район), кумшо дене Садовинмыт еш (У Торъял район) ойыртемалтыныт.
«Национальный эн сай кухньо» номинацийыште икымше степенян лауреат лӱм дене «Хунав» еш фольклор ансамбль (Чуваш Республик), «Ак калфак» еш коллектив (Параньга район) да «Маска тавраш» еш коллектив, кокымшо дене «Муро аршаш» вокал ансамбль (Марий Турек район) ден Садовинмыт (У Торъял район), кумшо дене Прозоровмыт (У Торъял район) ден Петровмыт-Русановмыт (Морко район) еш коллектив-влак палемдалтыныт.
Гран-прим «Маска тавраш» еш коллектив сеҥен налын.
– Шке тукымым 2016 ийыште шымлаш тӱҥалынам да кеҥеж жаплан ямдылен шуктенам ыле. Но фестивальыш ӱмаште ала-могай амаллан кӧра ушнен кертын огынал да садлан тений мияшак тыршышна. Чыла номинацийыштат шкенам терген ончаш манын, сайынак ямдылалтынна, поснак «Маска тавраш» тукым пушеҥге жапым налын. «Тавраш» – мемнан велне, Юлъялыште, «тукымым» тыге ойлена.
Фестиваль моткоч ойыртемалтше. Тудо кажныжым ешна, тукымна, вожна нерген келгынрак пален налаш кумылаҥда. А тидыже кызытсе жаплан моткоч кӱлешанлан шотлалтеш. Самырык-влакым патриотизм шӱлышеш кушташ негызым пуа, – палемден Юлъял тӱвыра пӧрт вуйлатыше Анатолий Мартынов. – Ты мероприятийыш миен толмо дене тӱрлӧ ешын историйже, йӱлаже, ойыртемже нерген пален налынна да, шонкален, шке ешна денат таҥастарен ончена.
А.Байкова
Фотом республикысе Калык усталык да тӱвыра ден
каныме паша шотышто шанче-методике
рӱдерын сайтше гыч налме
