Ленинград областьысе марий-влакын калыкле-тӱвыра автономийышт пелен пашам ыштыше «Марий тоштер» шке омсажым угыч почын.
Автономийжат, тоштержат Ленинград областьысе Келшымаш пӧртыштӧ верланеныт. Тоштерын фондшым тусо марий-шамыч шке родо-тукымыштын полшымышт дене пойдарен толыт, экспозицийымат сӧрастарат. Тушко марий калыкын историйже, тӱвыраже да йӱлаже дене кылдалтше экспонат-влакым чумыреныт. Фондым пойдараш Санкт-Петербургышто Российысе этнографий тоштерын специалистше-шамычат полшат. Тоштер дене ваш келшен пашам ыштыме да мероприятий-влакым пырля эртарыме шотышто ойпидышымат ыштеныт.
Шукерте огыл Марий тоштерыште уэмден олмыктымо пашам шуктеныт. Мо тушто вашталтын? Экспозицийын негызшылан «Традиционный марий еш» ончер шотлалтеш. Тушко марий ешын сурт кӧргысӧ арвержым чумырымо. Ик ужашыштыже пӧръеҥ-влакын илыш-йӱлашт, пашашт дене кылдатше экспонат-влак улыт. Весыже ӱдырамаш-шамычлан пӧлеклалтын: кидпашам шуктымо ӱзгарым, тӱрлӧ вуйчиемым, сӧрастарышым, курчак ден сувенир-влакым чумырымо. Лишыл жапыште эше «Марий калык вургем» дене кылдалтше лукым келыштарышаш улыт.
Келшымаш пӧртыштӧ 15 тӱрлӧ калыкын тыгай автономийышт лакемын да кажныжын шке тоштерже уло.
Снимкыште: Марий тоштерыште.
Фотом «Ший корно» автономийын воткыл лаштыкше гыч налме.
