Октябрь мучаште М.Шкетан лӱмеш Марий национальный драме театрыште «Китай кува» спектакльын премьерже лиеш.
Комедий мо нерген? Тушто кӧмыт модыт? Нине да моло нерген постановкын режиссёржо Роман АЛЕКСЕЕВ дене мутланышна.
– Роман Юрьевич, тиде пьесе кидышкыда кузе логалын?
– Анна Богачёван «Китайская бабушка» руш пьесыже театрысе артист-влак Маргарита Медикова ден Антонина Антоновалан келшен. Произведенийым лудын лектым, келшыш, садлан режиссер семын пашам ышташ кӧнышым.
– Руш пьесым марлаш кусараш кӧлан ӱшаненда?
– Театрыште сылнымут пӧлкам вуйлатыше Светлана Мартьяновна Белкован икмыняр пьесым кусарымыж нерген шукын палена. Тиде комедийымат тудо марлаҥден.
– Постановкышто кӧмыт модаш тӱҥалыт?
– Спектакльым кок состав дене ямдылена. Мила Денисовнан рольжым Маргарита Медикова ден Светлана Гладышева, Катерина Денисовнам – Антонина Антонова ден Светлана Сандакова, Павел Ивановичым – Юрий Алексеев ден Андрей Бусыгин, Анна Георгиевнам – Галина Иванова ден Ирина Кубекова, Игорь Андреевичым – Артём Асмаев ден Сергей Данилов. Спектакльым сценыш лукмаште художник Анастасия Чубукова тырша, а сылне сем дене Сергей Пчёлкин сӧрастара.
– Спектакль мо нерген? Калыклан тудо мо дене оҥай лийшаш?
– Пьесым самырык драматург Анна Богачёва иктаж 20 ий ончыч возен. Тудо тачысе илышлан моткоч келшен толшо. Илат вате-марий, кажне кече нимогай вашталтыш деч посна манме гай эрта. Кенета нунын деке Моско гыч ватыжын Мила акаже толеш да чылажымат фэн-шуй почеш «тӧрлаш» тырша. Тыге ешыште умылыдымаш лектеш. Фэн-шуй полшымо дене еш кокласе илышыште мо лиеш – тидын нерген спектакльым ончымеке пален налына.
Комедий гоч илышым йӧраташ, кажне кечым куанен вашлияш да тауштен ужаташ кӱлмым умылышаш улына. Шке нергенат мондыман огыл, суртышто шкенам кузе кучымо шотыштат шонаш таратышаш. Весат тургыжландара: илышыште ме проститлен моштена мо? Тидымат жапыштыже ышташ кӱлеш, тунамак нелеш налаш огыл манын йодын да шке йоҥылышым умылен, тӧрлен моштыман.
— Тиде спектакльым сценыш луктын шуктымекыда, могай пашалан пижыда?
– Театрыште режиссёр шукын улына, кажныже могай-гынат пьесе дене пашам ышта. «Китай кувам» луктын шуктымеке, театрнан шӧртньӧ фондшым шергалаш шонем. Репертуарыште ондак лийше, калыкын йӧратыме, палыме да марий шӱлышан спектакль-влак негызеш у постановкым шындаш шонымаш уло. Тыгак поэт Валентин Колумб нерген пьесылан материалым погена.
– Роман Юрьевич, Шкетан лӱмеш театрыште мыняр спектакльым сценыш лукмыдам иктаж гана шотленда?
– 2008 ий гыч иктаж 30 наре спектакльым.
– Режиссёр-влак вес театрлаште спектакльым шындат, а тендан кызытеш тыгай опытда уке. Мо дене кылдалтын?
– Вес театрла гыч темлымаш лийын огыл, адакшым шкеат кычалын омыл. Лач тиде театрын коллектившым сайын палем да тудын денак веле пашам ышташ, шонымым илышыш шыҥдараш куштылгыракла чучеш. Но вес театрыште иктаж спектакльым шыден ончаш кумыл уло.
– Роман Юрьевич, йодышем-влаклан вашештымыланда пеш кугу тау. Шонымашдам шукташ йӧн лектынак шогыжо, таза лийза!
–Тау, тенданат чыла сай лийже.
Алевтина БАЙКОВА мутланен
