МАРИЙ ТӰНЯ

Марий тӱня: Ханты-Мансийск

45 регион гыч миеныт

Апрель мучаште Ханты-Мансийск олаште Калык-влакын икоян улмо всероссийский  форумышт эртен.

 Тудо «Югра–Классик» концертно-театральный рӱдерыште лийын. Форум «Нарядная Россия» ончер-дефиле дене почылтын. Тушто тыгаяк лӱман  Россия» всероссийский конкурсын лауреатше-влакын коллекцийышт ончыкталтыныт. А тиде Российын 12 субъектше гыч толшо 12 участник: Тыва, Марий Эл, Татарстан, Башкортостан республикла, Иркутск, Курган, Липецк, Псков, Свердловск областьла, Югра, Ямал, Моско ола гыч нуно лийыныт.

Марий Элын чапшым Курыкмарий районысо Йыласал ремесло пӧртын пашаеҥже-влак араленыт. Нуно ХIX курым мучаш-XX курым тӱҥалтыште илыше курыкмарий ӱдырамаш-влакын пайрем вургемыштым ончыктеныт. Ремесло пӧртыштӧ пытартыш ийлаште тошто марий вургемым уэмден ыштыме пашам шукташ тӱҥалыныт да сай лектышыш шуыныт. Нина Тятюкован соцкыл лаштыкыштыже возымо гыч,  мероприятий моткоч келшен, поснак вес регионласе марий-влак дене палыме лияш йӧн лийме куандарен. 

Сургут марий-влакын чолга мер пашаеҥже Раиса Сунгуроват ты кугу форумын участникше лийын. Тудо палемден: форумыш 45 регион гыч 500 наре участник миен. Программыжат пеш поян лийын: тиде стратегический сессий, конкурс, ончер, «йыргешке ӱстел», семинар-практикум-влак.

С.Носова

Снимкыште: курыкмарий ӱдырамаш-влак шке ыштыш-кучышыштым ончыктат.

Фотом соцкыл лаштык гыч налме.

Опубликовать в Одноклассники

Добавить комментарий