Марий калык погын вашеш МАРИЙ ТӰНЯ

Марий калык погын лиешак!

ХI Марий калык погыным вес пагытлан огыт кусаре. Ончылгоч палемдыме семынак тудо 1-3 октябрьыште лиеш. Тидын нерген Погынлан ямдылалтме йодыш шотышто пресс-конференцийыште теҥгече Марий Эл правительстве председательын икымше алмаштышыже Михаил Васютин увертарыш.

Марий-влакым чумырышо ты кугу форумым эртарыме шотышто регион вуйлатыше Александр Евстифеев Российысе Роспотребназдзор вуйлатыше декат йодмаш дене лектын. Тушеч колтымо чыла темлымашым шотыш налаш кӱштеныт. Роспотребназдорын республикысе управленийжын специалистше-влакат ты мероприятийым эртарыме йодышым эскераш тӱҥалыт. Сандене погынын оргкомитетше чыла йодмашым шукташак тырша. Тиде амал денак пленарный заседанийым, секцийласе погынымаш-влакым эртараш келшен толшо икмыняр верым ойырен налыныт. Пленар заседаний М.Шкетан лӱмеш кугыжаныш драме театрыште лиеш гын, секций-влак Э.Сапаев лӱмеш академический опер да балет театрыште, С.Г.Чавайн лӱмеш калыкле книгагудышто, республикысе Мер-политик рӱдерыште, Изоскусство тошерыште эртат. Икманаш, карантинын йодмыжым шуктымаш Погынын содержательный ужашыжлан мешаяш ок тӱҥал.

Форумыш толшо 392 делегатлан вераҥаш кумдык ситышаш. А теве уна-влакым чынжымак шагал ӱжыныт — 25 еҥ гына. Ончылгоч мутланен келшыме почеш, кажне делегат погыныш корновируслан тестированийым эртен толеш. Йошкар-Оласе делегат-шамычат тидым тыгак ончылгоч ыштат. Тидын нерген журналист-шамычлан Оньыжа Эдуард Александров увертарен. Но эпидемийлан кӧра 9 делегат толаш тореш лийын. Чаманен каласыман, Погынлан ямдылалтме пагытыште неле чер кок делегатын ӱмыржым кӱрлын.

Марий погыныш толшо-шамычлан Йошкар-Олаште поян тӱвыра программым ямдыленыт. Тудын дене тӱвыра, савыктыш да калык паша шотышто министр Константин Иванов палдарен. Кум кечынжат марий рӱдола, кундем, калыкше, тӱвыраже ден палдарыше шуко мероприятий, экскурсий лийыт. 2 октябрьыште Печать пӧртын пырдыжыштыжат чолга просветитель П.П.Глезденевлан шарнымаш оҥам почшаш улыт. Эшежым ты кечылаштак И.С.Палантай лумеш тӱвыра да сымыктыш колледж ончылно А.Я.Эшпайлан памятникым почшаш улыт. Талантан еҥын 95 ияш лӱмгечыжлан пӧлеклалтше кугу концертат лиеш. Мутат уке, погыныш толшо делегат-влакын кумылыштым икымше кечынжак эртышашлык Пеледыш пайремат нӧлталшаш.

С.НОСОВА

Опубликовать в Одноклассники

Добавить комментарий