Мутат уке, шкеже ямдылалт ок керт, Йошкар-Оласе администрацийын виктарымыж почеш, тудым уэмден тӱзатыме пашам посна специалист-влак шуктат.
Марий паркым 2023 ийыште почмо. Калык тыгай кумдык кӱлеш манын, «Оласе средам йӧнаным ыштымаш» федерал проект кышкарыште всероссийский йӱклымаш гоч ойырен налын да моткоч чын ыштен. А 2025 ийыште паркым умбакыже тӱзатыме дене кылдалтше проект «Илышлан йӧнан инфраструктур» нацпроектыш пурен. Кок ий жапыште марий шӱлышан ты кумдык олаштына калыкнан ик эн йӧратыме кумдыкышкыжо савырнен шуктен. Тыште шуко кугу тӱвыра мероприятий-влак эртат. Еш денат канаш тӱрлӧ йӧн уло.
Республикысе муниципал образований чотым шотыш налын, паркыште 17 увертарыше стендым вераҥдыме. Кажныже ты але вес кундем нерген палдара. Кызыт нине стендла воктене брусчатке дене леведме площадкылам келыштырат. Кӧжӧ молан тиде кӱлеш манынат каласа, очыни. Кӱлеш. Поснак пайрем годым, теве вашке Пеледыш пайремыш чумырена, кажне муниципал образований гыч толшо-влаклан тушто вераҥаш йӧн лиеш. Оласе мэрийын увертарымыж почеш, стендла воктене тӱзатыме пашам мучашлымеке, газоным угыч уэмдат. Сандене тургыжланаш нимолан. Паркым тӱзатыме пашан кажне этапыштыже кузе шукталтмыжым муниципал заказчикын службыжо эскера.
Светлана Носова
Снимкыште: кажне стенд воктене тыгай йӧнан площадке лиеш.
Йошкар-Ола администрацийын воткыл лаштыкше гыч налме фото.
