Марий легенде негызеш

Йошкар-Олаште «Марий калыкын легендыже» пу гыч ыштыме скульптур всероссийский фестиваль-конкурс эртаралтеш.
Конкурс кок йыжыҥ дене эрта: икымше – 1 гыч 31 май марте uprku@mail.ru адрес дене электрон почтыш йодмашым, тыгак пу гыч ыштышаш скульптурыдан эскизшым колтыман; кокымшо – 6 гыч 10 август марте Марий парк кумдыкышто (Йошкар-Ола, Сомбатхей микрорайон, Ленин проспект) скульптурым ыштыме таҥас.
Фестиваль-конкурсыш 18 ийым темыше мастар-влак ушнен кертыт. Эн тӱҥжӧ – скульптур марий калыкын легендыж дене кылдалтше лийшаш, тидым шотыш налза! Эн оҥай да сай паша-влакым варажым Марий паркыште вераҥдат.
Проектын вуйлатышыже – спидкарвинг дене тӱнямбал чемпион Владимир Алманов. Тудо Козьмодемьянскыште шочын.
СПИДКАРВИНГ – тиде пушеҥге (пу) гыч бензопила дене писылык шотышто пӱчкедымаш

Л.СЕМЕНОВА