27 майыште Патриарший площадьыште Марий Эл вуйлатышын «Марий кеҥеж» проектше почылтеш. Тудо Предапринимательын кечыжлан пӧлеклалтеш.
Пайрем шӱлышан мероприятийыш толшо-влакым тӱрлӧ конкурс, пӧлек, весела программе, йоча аттракцион да тамле кочкыш вучаш тӱҥалыт.
Ты гана землякна, «Русское поле» фестивальыште национальный солянкым ямдылыме конкурсын гран-прижым сеҥен налше Игорь Антроповын мастер-классше шукыштым ӧрыктара. Тудо площадьыштак солянкым ямдылаш туныкта. Ты тутло кочкышым пайремыш мийыше кажне еҥ яра тамлен ончен кертеш.
А могай пайрем музык деч посна?! Шуматкече кастене республикысе рок-коллектив-влак «Рок под пальмой», «Легион 12 RUS», «Двоечники», «ELIXIR», «Snatch», «Апперкот» мастарлыкым ончыктат. Нуно шке произведенийыштым веле огыл, россий да тӱнямбал рок-хит дене палдараш тӱҥалыт.
А.БАЙКОВА
