Выставке-ярмиҥга
«Марий Элыште ыштыме»
Латкуд ий ончыч элнан президентше Россий предпринимательстве кече нерген указым луктын, да ту жап гыч ме тудым палемдена. Но эртыкыш савырнен ончалаш гын, предпринимательна-влак кодшо курымысо пужен ыштыме пагыт гычат огыл, тылеч ятырлан ончычак Российыште лийыныт: Демидовмыт, Морозовмыт, Елисеевмыт, Мамонтовмыт… Нуно шке бизнесыштым тыглай предприниматель семын тӱҥалыныт да кугу меценат марте кушкыныт. Илен-толын тиде кӱлешан тӱҥалтыш угыч мемнан илышыш пурен, да Россий предпринимательстве кече йӱлаш савырнен.
Республикыштына ты кече Йошкар-Оласе Чарла кремльыште «Марий Элыште ыштыме» выставке-ярмиҥга гыч тӱҥале. Пандемийлан кӧра ик-кок ий тудым эртарыме деч кораҥме ыле, вет предпринимательстве тугакшат нелылыкым чытен. Но правительстве велым изи огыл полыш пуалтын. Санденак тений республикыштына изи предпринимательстве эсогыл 800 наре предприятийлан кушкын. Шке пашам тӱҥалше-влакат ешаралт толыт. Изи бизнес предприятий-влакын сату оборотышт чумыр регионал продуктын 30 утла процентышкыже шуын, палемдыш выставке-ярмиҥгам почмо годым республикын промышленность, экономике вияҥмаш да торговльо министрже Станислав Крылов.
Тудын мутшым вияҥдыме семын «Марий Эл Торгово-промышленный палате» ушемын генеральный директоржо Герман Дементьев ешарыш: пандемий нелылыкым сеҥен лекме гын, санкций нелылыкымат кучем-обществе-бизнес тӱшка вий дене чытен лектына. А тидлан мо кӱлеш? Ышташ палемдыме гын, шуктыман, вет «предприниматель» мутшак ышташ пунчалме да тудым шуктымылан мутым кучымо дене кылдалтын, рашемдыш республикын ялозанлык да продовольствий министрже Андрей Кондратенко. А Марий Эл Кугыжаныш Погынын депутатше, Марий тӱвыра рӱдерын директоржо Наталья Пушкина предприниматель-влакым пайремышт дене саламлыш да выставке-ярмиҥгаш погынымышт дене кылден каласыш: палем да ӱшанем, Марий Элыште кеч-момат эн сайын ыштат!
Нунын выставке-ярмиҥгам ончал савырнымышт ты ойым чынжымак пеҥгыдемдыш. «Звениговский» шыл комбинат ден шӧр заводын, Йошкар-Ола шыл комбинатын, Республикысе шӧр заводын, Шернур сырзаводын продукцийыштым республикыштына веле огыл, ӧрдыжтат сайын палат да аклат. Тиде ганат нунын сатуштым налаш да тамлен ончаш кумылан еҥ ятыр ыле. Курыкмарий район Микрак потребобществын да Килемар район Арде кинде предприятийын кулинар изделийыштат шукылан келшыш. А моло райпо-влак ала-молан толын огытыл ыле. Очыни, пандемий деч вара тидлан эше тунем шуын огытыл.
Промышленный продукцийым ыштен лукшо-влакат ончычсо семын шуко огыл, но улыт ыле. Козьмодемьянск гыч «Потенциал» заводым ончыч тӱҥ шотышто выключатель ден розеткым ыштыше семын палена ыле гын, ынде светорегулятор ден тормостатымат ямдылат. Йошкар-Оласе «Геникс» НПФ» ООО ончыч мушмо да дезинфицироватлыме средствым вишкыдым гына луктын гын, кызыт таблетке гай пеҥгыдым да порошокымат, вӱдыжгӧ салфеткымат, парфюмерий ден косметике продукцийымат ышта. У предприятийла денат палыме лияш логале: «Канцблок – Волжск» ООО картон дене тӱрлӧ кӱлешлыкан коробкам, а Йошкар-Ола гыч «Мастер» ООО мончалан кӱлшӧ тӱрлӧ продукцийым ямдылат. Медведево ден Оршанке районла да Волжск гыч кидмастар-влакын изделийыштат кумылым савырышт. Чылашт нерген сай шонымаш гына кодо. Чылашт нерген «Марий Элыште ыштыме» манын аклен ойлаш лийын.
Адакше Йошкар-Олаште тиде кечын Чарла кремльыште веле огыл, тыгак Чавайн бульварыште продукцийым шке ыштен лукшо-влакын, Прохоров уремысе Бизнес-инкубаторышто фермер-влакын продукцийышт дене палдарыше ярмиҥга-влак эртеныт. Моло вере тӱрлӧ каҥашымаште предпринимательстве йодышым нӧлталме. Сандене тенийсе Россий предпринимательстве кече лачак кумдалыкше дене шарнымашеш кодеш.
Юрий ИСАКОВ
Снимкылаште: вуйлатыше-влак кидмастарын пашаж дене палыме лийыт; «Геникс» НПФ» ООО-н представительже-влак; тыште тамлен ончашат йӧн ыле.
Авторын фотожо