«Фонд развития территорий» публично-правовой компанийын средстваже кӱшеш коммунал инфраструктур системым модернизироватлаш Марий Эл Республикылан лимитым пеҥгыдемдыме. Тудын кугытшо – 615 миллион теҥге, тышеч 142 млн.теҥгем тений, а 473,6 млн. теҥгежым шушаш ийыште кучылташ палемдыме.
Коммунал озанлыкым вияҥдыме, корным тӧрлымӧ, илыме верым чоҥымо йодыш-влакым Россий Федерацийысе региональный вияҥмаш шотышто правительственный президиумын заседанийыштыже каҥашеныт. Тудым Россий правительстве вуйлатышын алмаштышыже Марат Хуснуллин вӱден. Марий Эл вуйлатыше Юрий Зайцеват заседанийын пашашкыже ушнен.
РФ чоҥымо, илыме вер да коммунал озанлык министр Ирек Файзуллин «Фонд развития территорий» компанийын средстваже кӱшеш коммунал инфраструктурым уэмдашлан 2027 ий марте окса полышым пуымо правил да регионысо программыла дене келшыше проект-влакын сайлан шотлымо тӱҥ параметрже-влак нерген каласкален.
Марий Эл вуйлатыше Юрий Зайцев калыкын илышыжым саемдыме шонымаш дене республикысе коммунал инфраструктурым модернизироватлаш кӱлмӧ да кумдыкым умбакыже вияҥдыме нерген йодышым федерал кӱкшытыштӧ ик гана веле огыл тарватен. Тидын нерген Ирек Фазуллин дене вашлиймыж годымат мутланеныт.
Январьыште фондыш 2023–2027 ийлан «Коммунал инфраструктур системым модернизироватлымаш» прогаммын проектшым колтымо. Программыш чылаже 8 объектым пуртымо, тышеч 5-ше вӱдым ситарыме да 3 кучылтмо вӱдым йоктарен колтышо объект-влак улыт.
Вӱдым тулымашым, инженер сетьлам, канализаций коллектор-влакым Козьмодемьянскыште, Юрино, Медведево, Звенигово, Морко да Шернур районлаште уэмдаш тӱҥалыт. Программыште палемдыме почеш 2023–2024 ийлан тичмаш финансирований, регионысо бюджет гыч ойырымо окса дене пырля, 746,3 миллион теҥгеш шуэш.
Марий Эл Республикым вуйлатышын администрацийжын информаций паша пӧлкажын уверже негызеш
Л.СЕМЕНОВА ямдылен
Д.РЕЧКИНЫН фотожо
