Ӱшан идалык дене!
Пагалыме лудшына-влак! 2022 ий эртен кайыш. Идалык кугу элнан илышыштыже чынжымак келге кышам кодыш. 24 февральыште Россий Украиныште специальный военный операцийым тӱҥале. Тачысе гаяк шарнем: 7 шагат 30 минут эрдене автомашина дене пашашке кудалам, радиом колыштам. А тушто кумдан палыме телеведущий Владимир Соловьев специальный военный операций тӱҥалме нерген ойла, ракете-влак Украина могырыш чоҥештыме да тушто военный объект-влакым пудештарыме нерген каласкала.
Варарак Украиныш Марий Эл гыч Росгвардийын подразделенийже-влак кайышт, эше ик пагыт гыч добровольческий марий батальон-влак (Онар, Иден, Акпарс, Полтыш). Шыжым РФ Президент частичный мобилизацийым увертарыш. Марий Эл гычат ятыр пӧръеҥ мобилизаций почеш Украиныш тушман деч иза-шольо калыкым аралаш кайышт. Ӱшанена, лишыл жапыште мемнан сарзына-влак бандеровский нацист-влакым кырен шалатат да сеҥымаш дене мӧҥгӧ пӧртылыт.
Марий салтак-влак специальный военный операцийыште шкеныштым чолган, лӱддымын ончыктат. Нунын кокла гыч иктыже Сергей Вячеславович Иштуганов Россий Президентын указше дене Российын Геройжо кӱкшӧ званий дене палемдалте. Кугешнена тале марий пӧръеҥ дене, тазалыкым, пиалым да илыше пӧртылаш тыланыме шуэш тудлан.
10 майыште РФ Президент В.Путин Марий Эл Республикым вуйлатышын пашажым жаплан шуктышылан Ю.Зайцевым шогалтыш. 23 сентябрьыште Юрий Викторович, сайлымаште сеҥымеке, Марий Эл Республикым вуйлаташ тӱҥале. «Марий Эл» газет редакцият тудын сеҥымашкыже шке надыржым пыштен, сайлымаш кампаний годым «Марий Эл увер» газетым марий калыклан марий йылме дене лукташ полшышна. Ӱшанена, Юрий Викторович уло вий-куатшым, паша опытшым Марий Эл Республикым вияҥден колташ, тыглай калыкын илышыжым куштылемдаш пуа. Тудын паша биографийжым ончалаш гын, коеш – вуйлатышынан потенциалже пешак кугу.
Эртыше идалыкыште республикыштына шуко сай паша ышталте. Мутлан, Йошкар-Олаште мотор да йӧнан автовокзал почылто. Кӱртньыгорно вокзал деч тораштырак верланен гынат, автобус-влаклан Шернур могырышкат, Морко-Волжск могырышкат ынде, юватылде. лектын кудалаш лиеш.
Йошкар-Олаштак Изи Какшан эҥер гоч у кӱвар почылто. Ынде Ширяйково кундемыште илыше, пашам ыштыше-влак Сомбатхей микрорайоныш вигак лектын кертыт. Тидын деч ончыч нунылан ола рӱдӧ гоч пробкылаште шоген эртыман ыле.
Эртыше ийыште марий калыкын эше ик сеҥымашыжым палемдыде ок лий. Шошым «Мари парк» проект «Оласе йӧнан кумдыкым ыштымаш» федеральный программыш пурталтын да йӱклымаште сеҥен. Тудо Тазалык аллей воктене верланаш да марий сын дене куандараш тӱҥалеш. Молан манаш гын тудо чылаштлан национально-ориентированный манме кумдык лиеш. Тушто каныме паркым, танцплощадкым да шке усталыкым, творчествым ончыкташ да шуараш кумдык-влакым ыштат.
– Шонымашыже теве могай: тӱҥ аллейыште республикысе 16 муниципалитетлан вер ойыралтеш. Тиде кугу площадке-шамыч лийыт. Тушто нуно, пайремак годым шкеныштым ончыктен, шкешт дене палдарен кертыт. Кажне район нерген уверым возымо табличке, кундемын картше лийыт. Тыге Марий паркыш толшо еҥ, рӱдӧ аллей дене эртышыжла. эше республик дене палыме лиеш, – каласен правительстве вуйлатышын икымше алмаштышыже Михаил Васютин.
Марий паркын почылтмыжым ынде моткочак вучаш тӱҥалына. Вет йӧратыме Пеледыш пайремна варажым тиде паркыште эрташ тӱҥалеш. Адакшым Пеледыш пайрем 2022 ийыште кугыжаныш статусым налын. Тидлан Марий Элым вуйлатыше Ю.Зайцев лӱмын пунчалым луктын.
Эртыше идалыкыште шкенан коллективнат ятыр сеҥымашке шуын. Ю.Исаков РФ сулло журналистше лӱмым налын. Юрий Валентинович тыгай кугу званийым 40 ий утла журналистикыште, «Марий Эл» газетыште кыртмен тыршымыж дене сулен. Тӱҥ редакторын алмаштышыже С.Пехметовалан марий журналистикыш кугу надырым пыштымыжлан Ю. Русанов лӱмеш премийым кучыктеныт. Коллективыштына 10 журналист сулло лӱмым нумалеш. Тений эше ик еҥ – Е.Эшкинина – ты кӱкшӧ лӱм дене палемдалтын. Тыгак А.Байкова, М.Иванова, Л.Камалетдинова тӱрлӧ кӱкшытан кугыжаныш награде дене палемдалтыныт. Чылаштымат эше ик гана саламлена.
Икманаш, эртыше идалык куанымат кондыш, ойгыжат ӧрдыж гыч эртен ыш кай.
Шушаш 2023 ий мыланна мом конда? Ӱшаныме шуэш: куаным, сеҥымашым, пиалым!
А.Абдулов, «Марий Эл» газетын тӱҥ редакторжо
