29 майыште Москва областьын правительствыштыже Изи олала ден исторический илемлаште тачысе илышлан келшен толшо ола кумдыкым тӱзатымаш эн сай проект всероссийский конкурсын финал мероприятийже эртен.
Куанже могай! Тушто Звенигово муниципал образованийын «Эҥер сер – Звенигово олан чонжо» проектше «10000 гыч 20000 еҥ марте чотан изи ола-влак» номинацийыште сеҥыше-влак радамыш логалын!
Тиде проектлан федеральный бюджет гыч 55 миллион наре теҥге окса ойыралтшаш. Проект дене келшышын, тиде окса дене ынде Юл эҥер серым тӧрлатат да йолешке-влаклан кошташ, велосипед дене кудалышташ асфальт корным ыштат, вӱд деке волымо верым уэмдат, скейт-паркым, спорт площадкым чоҥат, каныме верым, йоча площадкым тӱзатат, пушеҥгым шындат, тулым шупшыт да молат. Паша 2019 ийыште мучашлалтшаш. Чыла тидыже Звенигово олаште илыше калыклан канашыже сай йӧным ышта, районышто туризмым вияҥдаш, турист-влакым утларак кумылаҥдаш полша.
Л.Камалетдинова.
