11 февральыште Медведево районысо Кугу Шап ялыште кокымшо гана республике кӱкшытын «Лийдымат лийын кертеш» ойыртемалтше издер конкурс лиеш.
Тушко ик еҥ, еш але пашаче коллектив-влак ушнен кертыт. Тӱҥжӧ – конкурсыш темлыме издер ӧрыктарышаш. Мутлан, кодшо ийын конкурсант-влак ты мунчалтыме арверым тюбинг, пу, пластик полшымо денат ыштеныт. А издерын мунчалтымаште шкенжым кузе ончыктымыжым таҥасыме кечын аклат. Кушко шумеш кайымыжым, озажын тудлан презентацийым эртарымымат жюри эскераш тӱҥалеш. Ойыртемалтше костюмым чияш, почеламутым лудаш, мурым мураш, издерым тӱрлӧ семын сӧрастараш лиеш. Икманаш, кӧн фантазийже молан сита. Икымше конкурсышто курык гыч мӱкш, МРТ аппарат, коҥга сынан конструкцият мунчалтен волен.
Тений сеҥыше-влакым вич номинацийыште палемдат. Тӱҥ сеҥышым пӧлек шотеш 20 тӱжем теҥге вуча. Конкурсыш ушнаш шонышо-влак йодмашым тыгай адрес дене ончылгоч колтышаш улыт:opuchka777@gmail.com.
С.Носова
Фотом ru.freepik.com сайт гыч налме
