«Марий Эл Республик здравоохраненийын первичный звеножым 2021-2025 ийлаште модернизироватлымаш» программым илышыш пуртымо кышкарыште Морко районысо рӱдӧ больницым умбакыже олмыктат. Таче кечылан тыште оралте леведышым олмыктен пытарыме, тулым чытыше материалым гына шупшаш кодын.
Пытартыш 35 ий жапыште тиде эмлымверым икымше гана тӱрыснек олмыктат. Чумыр паша 22 млн. утла теҥгеш шуэш. Леведыш деч посна вӱдым кондыштарыме да канализаций системыламат уэмдаш кӱлеш. Тымарте эше икымше пачашыште окнам вашталтыме, тиде пашам моло вереат шукташ палемдыме.
Тиде арнян санузеллаште да санитарный пӧлемлаште плиткым пыштат.
Морко районысо рӱдӧ больнице 145 ияш лӱмгечыжым уэмдыме зданийыште палемдышаш, вет чыла пашам декабрь марте ыштен шуктышаш улыт.
М.ИВАНОВА
