Марий Элыште шурным погымо, пареҥгым лукмо паша мучашке лишемын, пел кумдыкышто пакчасаскам поген налаш кодын.
Ялозанлык да кочкыш сату министерствын увертарымыж почеш, арня тӱҥалтышлан районлаште вич тӱжем утла гектарыште, але ончен куштымын ныл процентыштыже, шурно шияш кодын. Кугурак кумдыкышто Параньга, Шернур да Кужэҥер районлаште поген налман.
Пареҥгым пӱтынь кумдыкын 6 процентыштыже, але 170 утла гектарыште, лукташ кӱлеш. Гектар еда кокла лектыш – 243 центнер. Пакчасаскам 49 процент гыч поген налме.
Тений кургым ямдылыме паша поснак сайын ушнен толын. Мутлан, силосым планын 186 процентшым оптымо, чылаже 448,9 тӱжем тонным шапашлыме. Ты гана кукурузо чаплын шочын ыле. Сенажым ӱмашсе деч 42 тӱжем тоннлан шукырак ямдылыме.
Вячеслав Смоленцевын фотожо.
