Марий Эл вуйлатыше Юрий Зайцев ден Жуков орденан Юл кундем округышто РФ национальный гвардий войскан командующийже генерал-полковник Сергей Просяник сайлымаште общественный лӱдыкшыдымылыкым ыштыме йодышым каҥашеныт.
Республик вуйлатыше палемден: Марий Элыште Росгвардийын регионысо управленийже дене пайдале вашкыл ышталтын.
– Элнан президентше Владимир Владимирович Путинын шындыме задачыжым ме пырля рашемдена. Марий Эл гыч специальный военный операцийыште улшо-влак кокла гыч 70 утла еҥын кугыжаныш награде дене палемдалтмыже мыланна кугу кугешнымаш.
Ме критический инфраструктурын стратегический объектше-влакым аралыме шотышто пашам пырля шуктена. Тиде арняште элыштына кӱлешан событий – Кугыжаныш Думыш депутат-влакым сайлымаш – лиеш.
Росгвардийын Марий Элысе управленийжын пашаеҥже ден военнослужащий-шамыч сайлымаш комиссий-влак верланыме да бюллетеньым аралыме верлаште лӱдыкшыдымылыкым эскерымашке ушнат. Ӱшанем: нуно шке задачыштым молгунамсе семынак кӱлеш семын шуктат, – палемден Юрий Зайцев.
Росгвардийын Юл кундемысе округшын командующийже ведомствын шуктымо пашаж нерген ойлен.
– Тӱҥ задаче – Юл кундем федеральный округысо 14 субъектыште порядкым эскерымаш.
Ме шындыме задачым специальный военный операций кайыме районышто, Белгород область воктене да у кундемлаште шуктена, – палемден
генерал-полковник Сергей Просяник.
Тудо регион вуйлатышым Росгвардийын Марий Элысе управленийжын у начальникше полицийын полковникше Сайдмагомед Юнаев дене палымым ыштен. У вуйлатыше МВД органлаште кужу жап пашам ыштен. 2016 ийыште Росгвардийыш куснен. Йӱдвел Кавказыште службым эртен.
Вашлиймаш деч вара Юрий Зайцев ден Сергей Просяник Национальный гвардийын войскаже-влак федеральный службым ыштымылан 10 ий теммылан да Россий правопорядке войска-влакым ыштымылан 215 ий теммылан пӧлеклалтше мероприятийлашке ушненыт. Ведомствын ветеранже, пашаеҥже да Росгвардийын шефствыш налме тунемшышт-влак дене пырля национальный гвардий войска-влакын аралышыжлан шотлалтше святой апостол дене тӧр улшо Владимир князь лӱмеш нӧлтымӧ часамла ончылан клёным шынденыт. Часамлаште молебен лийын. Тудым Йошкар-Ола да Марий митрополит Иоанн эртарен.
Росгвардий 2016 ийыште 5 апрельыште Россий президентын указше дене ышталтын. Таче Марий Элыште ты ведомствышто СОБР-ын «Берсерк» ден ОМОН-ын «Таир» спецподразделенийже-влак, Лицензионно-разрешительный паша рӱдер ден вневедомственный охране отдел улыт.
Марий Эл вуйлатышын пресс-службыжын уверже негызеш Любовь Камалетдинова ямдылен.
