Шарнымаш сорта…
Лӱддымӧ, чолга лийыныт
11 апрельыште Волжский район Сотнур кыдалаш школышто ты школын кок выпускникшылан, СВО-што ӱмыр лугыч лийше офицер М.Микутовлан, Р.Александровлан «Геройын партшым» торжественно почыныт.
Ты кечынак Сотнур кыдалаш школышто лӱйкалымаш дене районын первенствыже эртаралтын. Тушко Волжск ола гычат кумылан-шамыч ушненыт. Тудат Максим Микутов ден Руслан Александровым шарнымылан пӧлеклалтын.
Нунын нерген школыштат, селаштат поро мутым гына ойлат. Школышто герой, военнослужащий-шамычлан лӱмынак «Защитники Отечества» стендым ыштеныт. Тудыжым кокымшо пачашын фойештыже келыштареныт. Туштак мемориал оҥа уло. Сӧй пасуэш порысыштым шуктышыштла, ӱмыр лугыч лийше рвезе-влак мыланна герояк улыт, вет шке илышым чаманыде, молым арален кодащ патырлык, лӱддымылык кӱлыт.
– Тыгай кӱлешан мероприятийыште шымле наре йоча, кугыеҥ-влак лийыныт. Тудым йӱлаш пурташ шонена. Эн тӱҥ шонымашнаже – тунемше-влакым патриотизм шӱлышеш кушташ, – ойла воспитаний шотышто директорын алмаштышыже Валентина Иванова. – Торжественный ужашыште Российын, Марий Элын, Волжский районын гимнышт йоҥгыш. Мероприятийым вӱдышӧ-влак сай, эллан ӱшанле эргым куштымыштлан ача-аваштлан тауштеныт, вет нунын дене ме кугешнена.
Чын офицер
Максим 1994 ий 14 июньышто шочын. Школышто тунеммыж годым «СОБР» (Сотнурский отряд быстрого реагирования) военно-патриотический клубын чолга воспитанникше лийын. 2011 ийыште Сотнур кыдалаш школын кадет классшым пытарен, генерал В.Маргелов лӱмеш Рязаньысе юж-десант войскан кӱшыл командный училищыжым тунем лектын.
2014 ийыште Максим Москошто эртыше Сеҥымаш Парадыште участвоватлен. Варажым, 2016 ийыште, Уссурийскыш служитлаш колтеныт. 2020 ийыште Сирийыштат порысшым шуктен. Боевой действийын ветеранже лийын. Чолгалыкым ончыктымыжлан «Манёвры Восток-2018», «Участник военной операции в Сирии» медаль-влак дене палемдалтын. 2022 ий март гыч специальный военный операцийыште участвоватлен.
12 апрельыште Мариупольышто специальный задачым шуктеныт. Палемдыме объект деке лишеммышт годым Максимын группыжо засадышке логалын. Нунышт противотанковый гранотомёт ден миномёт гыч лӱйкалаш тӱҥалыныт. Гвардий старший лейтенант, десантно-штурмовой рото командирын алмаштышыже Максим Микутов геройла колен. Воинский долгым шуктымыж годым патырлыкым ончыктымыжлан марий эргым колымыж деч вара Мужество орден дене наргадитленыт.
Максим Евгеньевичын пелашыже, эргыже тулыкеш кодыныт.
Артист лияш шонен…
Руслан Александров 2003 ий 22 январьыште Йошкар-Олаште шочын. 2010 ийыште Сотнур кыдалаш школыш 1-ше классыш тунемаш каен. Тунеммыж годым Русланат «СОБР» военно-патриотический клубыш коштын. 2017 ийыште Сотнур кыдалаш школын командыж дене всероссийский президент состязанийыште (тудыжо Анапа олаште эртаралтын) вийжым терген. Рвезе классыштыже моткоч чолга улмыж дене ойыртемалтын. Почеламутым, мурым возен, актёр усталыкше палдырнен. Артист лияш шонен.
2019 ийыште 9 класс деч вара И.С.Палантай лӱмеш тӱвыра да сымыктыш колледжыш тунемаш пурен. Тӱрлӧ амаллан кӧра Озаҥ олашке информаций дене кылдалтше ик техникумыш куснен.
2022 ий майыште тудым армийыш налыныт. Марий рвезе Архангельский область Мирный олаште служитлен. Тиде ийынак июльышто военный службыш каяш контрактым подписатлен. Августышто нунын группыштым Украиныш, боевой действий зоныш, колтеныт. 5 сентябрьыште Руслан сӧй пасу гыч кум боевой йолташыжым утарен.
РФ президентын указше дене Руслан Александров Мужество орден дене палемдалтын. Чаманаш гына кодеш, 11 сентябрьыште воинский порысшым шуктышыжла, 19 ияш марий рвезе ӱмыр лугыч лийын.
Порысыштым тӱрыс шуктеныт…
Присягым шуктен, пуля йӱр вошт эртеныт, йолташыштын, элын ӱшанле эргышт лийыныт.
Мероприятийыште Волжский район администраций вуйлатышын алмаштышыже Сергей Сычёв, Афганистаныште служитлыше ветеран-влакын Российский ушемыштын Волжск да Волжский районысо пӧлкан правленийжын председательже Юрий Шишкин, Волжский муниципальный район администрацийын образований отделжым вуйлатыше Елена Куликова, «Волжский муниципальный район администрацийын образований отделже» учрежденийын физический культур, спорт да молодёжный политике секторжым вуйлатыше Татьяна Головина лийыныт.
Герой-влакым шарналтен, участник-шамыч ик минут шып шогеныт.
Геройын партше
Сотнур кыдалаш школын выпускникше-влак Максим Микутов ден Руслан Александров лӱмеш Геройын партшым торжественно почаш нунын ачашт ден аваштлан ӱшаненыт. Руслан Александровын партше руш йылме да литератур кабинетыште шинчаш тӱҥалеш, а Максим Микутовын – ОБЖ кабинетыште.
Школ директор З.Павлован палемдымыж почеш, Герой-влак партышт коклаште школын эн сай тунемшыже-шамыч шинчаш тӱҥалыт.
Мероприятий жапыште шӱм-чоным, кумылым тарватыше шуко поро мут йоҥген.
Тыге кок парт мемнан ончыкылык волгыдо илышна верч вуйым пыштыше-влакым, пӱтынь калыкын ойгыж нерген шарныкташ тӱҥалеш.
Туралык деч посна нигузе
Торжественный ужаш деч вара пневматический винтовко гыч лӱйкалымаш дене районын первенствыже эртаралтын. Таҥасымаште командым, тыгак личный зачётым шотыш налыныт. Тура, писын да чын лӱйкалымаште кандаш школ гыч тунемше-влак мастарлыкыштым ончыктеныт. Чыла участник тыршен. Ӱдыр-рвезе-шамыч коклаште, чынжымак, шокшо таҥасымаш лийын. Команде, тренер-влакат тургыжланеныт.
Личный зачётышто икымше верыш Волжск ола гыч А.Храмов (45 очко), кокымшыш Сотнур кыдалаш школ гыч М.Мушкин (41 очко), кумшо верыш Шарача кыдалаш школ гыч Д.Купоров (36 очко) лектыныт. Ӱдыр-влак коклаште Шарача кыдалаш школ гыч Е.Чибаева (41 очко), Волжск ола гыч Д.Наянова (41 очко), ты ола гычак А.Юшкова (36 очко) ойыртемалтыныт.
Команде-влак коклаште икымше верым Волжск ола гыч команде налын, а ший призёр – Шарача кыдалаш школын сборныйжо. Кумшо верыш Сотнур кыдалаш школ лектын.
Сеҥыше ден призёр-влакым организатор-шамыч Чап грамот, кубок да медаль дене палемденыт.
В.Иванова, Сотнур кыдалаш школышто воспитаний шотышто директорын алмаштышыже.
Е.Эшкинина ямдылен.
В.Иванован фотожо.
