Марий Эл - 100 МЕР ИЛЫШ ДА ЙӰЛА

«Лӱмлӧ еҥ – «Марий Элым» лудшылан»

 

Тиде поро йӱлана умбакыже шуйна. Ончычсо подписке кампанийыште Мер Каҥаш вуйлатыше, Оньыжа Эдуард Александров ден оналмаш Валерий Мочаев газетналан возалтше-влаклан чапле книга пӧлекым ыштеныт.

Ты поро йӱлашке моло-влакымат ушнаш ӱжына.

Кодшо кечылаште, шкешотан акцийым эртарымына нерген нален налмеке, В.М.Васильев лӱмеш МарНИИЯЛИ директор Евгений Кузьмин тушко ушнаш кумылым ончыктыш. Тыгай шонымашыже кузе шочмо нерген тудо тыгерак каласыш:

– Тачысе кечылан марий тӱняште улшо лӱмлӧ еҥ-влакым пален шогаш кӱлеш. Сандене «Марий Эл» газет редакций сай шонымашке шуын: марий тӱняште кызытсе палыме еҥ-влакым пырля ушен, марий-влакын тӱҥ газетыштлан полышым пуымо семын лудшыжо-влаклан пӧлекым ышташ шонен, акцийым тӱҥалын. Мыйын шонымаште, кажне марий айдеме тиде тӱҥ газетлан подпискым ыштышаш, «Марий Элым» лудшаш. Вет тушто мемнан республикын уверже гына огыл, а «марий нервше» возалтын. Тиде «нерв» манмыжым ме шижшаш, ваш-ваш колыштшаш улына. Тыге гына: марий газетым лудын, пырля ваш колыштын, пагален, ме марий тӱнянам вияҥден, шканна шке оза лийын кертына. Умбакыже, икте-весын вачым шижын, ончыко пырля каяш тӱҥалына.  Мыйын шонымаште, тиде акций еҥ-влакым, калыкым  ушаш, марий нацийым чак чумыраш, ваш-ваш умылаш полша. Сандене тиде акцийым мый куанен вашлийынам да «Марий Эл» газетын лудшыжо-влаклан мемнан лукмо книга-влакым уло кумылын пӧлеклем.

* * *

Поро йӱлашкына ушнышо эше ик лӱмлӧ еҥ – Марий Эл Кугыжаныш Погын вуйлатышын алмаштышыжын полышкалышыже, Россий Писатель ушемын еҥже, Марий Элын сулло журналистше Александр Петров:

– Тиде акций эртаралтме нерген пален налмеке, мый тушко уло кумылын ушнышым. Молан манаш гын, тудын дене пайдаланен, марий калыклан, лӱмлӧ марий еҥ-влаклан пырля ушнаш, кӱлешан тӱрлӧ пашам пырля эртараш полша. Тыгак марий калыкын тӱҥ марий газетшылан, «Марий Эллан», подпискым ышташ кумылаҥдыме шот денат тиде моткоч кӱлешан паша.

Мыйын шонымаште, кажне лӱмлӧ еҥ марий калыкнан тӱҥ газетшым лудшаш, вет тыште мемнан республикнан, марий калыкнан, марий калыкын палыме еҥже-шамычын марий калыкым вияҥдымашке виктаралтше пашашт эре ончыкталтеш. «Марий Эл» газетыште савыкталтше тыгай статья-влак моло еҥланат пример шотеш лийын кертыт. Ала-могай кӱкшытыш шушо еҥ нерген  ойлалтеш гын, весым тушко шуаш тарата. Мутлан, искусствышто чапланен гын, тиде велым вияҥ толаш кумылым луктеш. Сандене тиде акций моткоч пайдале да кӱлешан.

Ме, марий-влак, ик оян лийшаш, кеч-могай пашамат ваш умылен, ваш полшен ышташ тыршышаш улына. Тунам гына мемнан марий калыкна тиде тӱняште эшеат виян лиеш, тунам гына моло калыкат мемнам, марий-шамычым, умылаш, колышташ да пагалаш тӱҥалыт.

 

Тачысе унана-влакын ойырымо нине книга пӧлекышт ончыкыжым тыланда, «Марий Эл» газетналан возалтше-влак кокла гыч ала-кудыжлан, логал кертыт. Тугеже вучыза.

Любовь Камалетдинова

Авторын фотожо

Опубликовать в Одноклассники

Добавить комментарий