2025 ийыште школ-влакым капитально олмыктымо паша «Молодёжь да йоча-влак» нацпроект кышкарыште эртаралташ тӱҥалеш.
Тений Марий Эл гыч тушко 9 общеобразовательный организаций пурталтын.
Школ кумдык тачысе жапын йодмашыжым шуктышо лийже манын, элна мучко Россий кӱкшытан «Школа мечты» марафон эрта. Тушко капитально олмыктышаш школла гыч кумытшо – Руэм посёлкысо Шуко профилян лицей-интернат, Волжск оласе лицей да Марий Турек районысо Мариец посёлкысо школ – ушнен. Палемдыме тунемме вер-шамычлан дизайн-проектым вузлаште «Дизайн», «Архитектур», «Чоҥымаш», «Социологий» да «Педагогический образований» направленийла дене тунемше-влак ямдылат. Кызытлан МарГУ ден ПГТУ-н студентше-влак школласе чолга тунемше, туныктышо, ача-ава-шамыч коклаште йодыштмашым эртареныт, вара эксперт-влак дене вашлийыныт.
«Дизайным ямдылымашке тунемше-влак шкешт да мемнан студент-шамыч ушненыт – тиде сай. Самырык тукымын ушнымыжо – кызытсе жаплан келшыше да тунемше-шамычлан йӧнан тунемме кумдыкым ышташ полыш», – палемден Марий Элым вуйлатыше Юрий Зайцев.
Г.Кожевникова
Фотом Марий Эл Образований да науко министерствын сайтше гыч налме