«Марий Чодра» национальный парк Яльчик ер воктене каныше-влакым шижтара: кызытеш ерыште йӱштылаш келшен ок тол!
Марий Элысе Роспотребнадзор управленийын темлымыж почеш, «Марий Чодра» национальный парк Яльчик ер воктене каныше-влак коклаште йӱштылмӧ шотышто шижтарыме пашам тӱҥалын. Ерыште йӱштылмӧ деч вара церкариоз дене черланымым пален налмек, эпидемиологий велым шымлымашым эртарыме. Рашемын: чынжымак, йӱштылмӧ годым еҥ-влак заразитлалтын кертыт.
Эксперт-влакын иктешлымашышт ончыктен: Яльчик ерыште шодо моллюск-влакым, вес семынже нуно прудовик обыкновенный маналтыт, муыныт, а вӱдыштӧ ийын коштшо лудо-шамыч церкарийшистосоматид черын «озажлан» шотлалтыт. Келыштарыдыме верлаште ида йӱштыл, палемдыме кумдыклаште гына каныза, шижтара «Марий Чодра». Тыгай верлажым паркын 2024 ий 26 апрельыште лукмо 165-ше №-ан приказше дене пеҥгыдемдыме.
Паркын пашаеҥже-влак громкоговоритель гоч, вашлийын мутланыме годым умылтарыме пашам наҥгаят, моло йӧнымат кучылтыт. Посна аралыме пӱртӱс кумдыкышто йӱштылаш лийдыме верлаште увертарымаш щитым шогалташ ямдылат.
Канаш толшо-влакым шолем, кӱдырчан йӱр, тӱтан мардеж тарваныме годым тӱткӧ лияш ӱжыт, тулым ылыжтыме деч шижтарат. Жапым шуйкалыде, сер воктеч кораҥман да чодыра гычшат лекман. Кугу мардеж годым пушеҥге йымалан шылаш лӱдыкшӧ, умылтарат специалист-влак.
Л.СЕМЕНОВА
Фотом «Марий Чодра» национальный паркын соцкылже гыч налме
