«Кырланур – луй модмо вер» калык проектыш Шернур кундемыште шочын-кушшо артист ден мурызо-влак рӱж ушненыт.
Шернур тӱвыра полатыште эртарыме «Муралтем мый йывыртен» поро кумыл концертыш толшо зал тич калык иканаште тынар шуко шке вел лӱмлӧ артист ден мурызым шукертак ужын огыл. А вученыт улмаш чыланат – калыкшат, сценыш лекшыже-влакат. Кажне мурызо шочмо кундемышкыже куанен толмыжо, муро да сем гоч пошкудо ден родо-влаклан чон шокшыжым почын пуымыж нерген ойлен. Мурызо Эльвира Попован саламлалтме ойжо, «…Соскучилась!» манмыже, тӱшка кумылым почын пуыш.
Мероприятийын амалже моткоч кугу – историйым, марий мландым, пӱтынь Российым тӱнямбалне чапландарыше Йыван Кырлан лӱмжым курымешлан аралаш, тудын шочмо вершӧржым тӱзаташ, кушкын толшо тукымым айдемын чон яндарлыкшым аклаш туныкташ.
Проектым илышыш шыҥдараш полшышо-влаклан тауштен ойленыт округысо администрацийым вуйлатыше Александр Кугергин ден «Истоки» Шернур землячествым вуйлатыше Евгений Пайдышев. Туныктышо-ветеран Зинаида Ермакова «Кырла» поэмыж гыч ужашым йоҥгалтарен. Марий Элын калык писательже, проектын авторжо Зоя Дудина палемден: «Тыгай кугу пашам илышыш шыҥдараш тунам гына лиеш, кунам айдеме пӱтынек шочмо калыкшын кӧргӧ чонжым шижеш».
Концерт программым Россий Федерацийын сулло, Марий Элын калык артистше Маргарита Медикова, Марий Элын сулло артистше-влак Эльвира Попова, Алина Егошина, Александр Бирюков, Любовь Купсольцева, тыгак Марина Воронцова, Надежда Четкарёва, Наталья Зуевас, Александр Купсольцев, Надежда Ибашева, Татьяна Попова, Саша Иванов, Татьяна Галкина-Смородинова, Александр Коновалов, Саша Иванов, «Ныжыл сем», «Рвезылык сем», «Баян Х» дуэт, «Пӧлек», «Ласточка», «Любава» ансамбль-влак сӧрастареныт.
Шижыда, М.Шкетан лӱмеш Марий национальный театр ден Марий самырык театрыштыжак Шернур вел гыч мыняр артист улыт? Эше чыланжак миен кертын огытыл.
А Маргарита Медикова концерт деч вара вигак каласыш: «Ӱжса, чумырыза мемнам, шочмо кундемлан порыснам пуаш эре ямде улына!» Тиде шонымашым чыла артистат совым кырен, юарлен пеҥгыдемдышт.
Концерт гыч чумырымо шийвундым, 130 утла тӱжем теҥгем, Евгений Викторович Зоя Михайловналан кучыктыш. Шым ий ончыч землячестве дене Йыван Кырла лӱмешак кок кугу концертым ончыктымо ыле. Тунамсе оксамат ты проектланак ойыраш лийме.
А кызыт Купсола ялыште паша шолеш. Верысе бригаде Кырлан тоштер-пӧрт кӧргыжым келыштара. Ыштышаш сомыл эше ятыр, сандене концерт программе дене моло район рӱдылашкат лекташ шонымаш йоҥгалте.
Светлана Пехметова.
Шернур землячествын архивше гыч налме фото.
