Республик вуйлатыше Юрий Зайцев Марий Элысе чрезвычайный ситуаций лийын кертме лӱдыкшым ончылгоч кораҥдыме да пытарыме, пожар лӱдыкшыдымылыкым ыштыме шотышто комиссийын заседанийжым эртарен.
– Тӱҥ задаче – чрезвычайный ситуацийлаште, тидын шотыштак вӱдшор да пӱртӱс пожарлан кӧра лийше туткарлаште, еҥ-влак колышаш огытыл. Еҥ-влаклан лӱдыкшыдымылыкым ыштымаште кырча-марча лийын огеш керт, – каласен Марий Эл вуйлатыше.
2024 ийыште шошо вӱдшорым аварий деч посна эртараш гидротехнический сооружений-влакын ямде улмышт нерген республикын пӱртӱс поянлык, экологий да йырым-йырысе кумдыкым аралыме министр Алексей Киселев ойлен. Тудо вӱдшорлан ямдылалтмаш штат режимыште шукталтеш, диспетчер службо пашам ышташ тӱҥалын, гидротехнический сооруженийлаште, тыгак вӱд ташлымым эскерыше мобильный группо-влакын дежурство графикыштым ямдылыме манын палемден.
Тылеч посна гидротехнике сооруженийым норматив состоянийыш кондымо шотышто паша план почеш эртаралтеш, республик кумдыкышто 87 гидротехнике сооруженийым капитально олмыктымо, тиде пашалан 289 миллион утла теҥге ойыралтын, ойлен министр.
Алексей Киселёв увертарен: Марий Элыште Куйбышев да Чебоксар водохранилищыла, Изи Какшан, Элнет, Рутка, Кугу Кундыш эҥерла воктене улшо 22 кумдыкышто вӱд чот шарлыме але нунын вӱд йымаке кайыме лӱдыкшӧ уло. Нине кумдык-влакын чекышт нерген уверым Вер гыч верыш кусараш лийдыме пого единый кугыжаныш реестрыш да кугыжаныш вӱд реестрыш пуртымо.
Марий Эл вуйлатыше Юрий Зайцевын палемдымыж почеш, муниципал образований-влакын вуйлатышышт да вӱд йымаке логал кертме лӱдыкшӧ улмо участке-шамычлан вуйын шогышо-влак велым контроль лийшаш.
Тудо ойлен: кызыт кучем орган-влакын тӱҥ задачышт – вӱдшорлан ямдылалтме годым пашам туге шуктыман, эсогыл событий вияҥме эн уда сценарий почешат калыклан лӱдыкшӧ лийшаш огыл. Тыгак пӱртӱс азап деч эҥгекым мыняр лиеш, тунар иземдыман.
Марий Эл вуйлатышын пресс-службыжын уверже негызеш Л.Камалетдинова ямдылен
Д.Речкинын фотожо
