Йошкар-Олаште ийготыш шудымо-влаклан паша ярмиҥга эртен.
Тудо пашам кычалше самырык еҥ ден профессийыште кушкаш икымше тошкалтышым темлаш ямде пашам пуышо-влакым иктыш чумырен.
Ярмиҥгашке пашам пуышо 10 утла еҥ толын.
Калыклан пашам ситарыме рӱдерын специалистше-влак ийготыш шудымо ӱдыр-рвезе-влак ден компаний-шамычын еҥыштлан ваш мутланаш чыла шотыштат келшыше йӧным ыштеныт.
Мероприятийыште консультацийым пуымо пункт-влак лийыныт. Тушто специалист-шамыч подростко-влаклан резюмем ямдылаш полшеныт, пашам пуышо дене мутланаш туныктеныт, паша законодательствын тӱрлӧ шӧрынжӧ дене палдареныт.
Ийготыш шудымо-влаклан эртарыме тиде ярмиҥга самырык тукымлан паша корным официально тӱҥалаш полшышо, формальный огыл паша деч аралыше кӱлешан мероприятий улмыжым эше ик гана пеҥгыдемден.
Снимкыште: ӱдыр-рвезе-влак резюмем ямдылаш тунемыт.
Марий Элын Паша да социальный аралымаш министерствыжын фотожо.
