23 августышто Мордовий Республикын рӱдолаштыже, Саранскыште, национальный коллектив-влакын «Мы вместе» всероссийский молодёжный усталык марафонышт эртен.
Родо-тукым калык-влакын тӱвыра поянлыкыштым почын ончыктышо пеш шуко мероприятий лийын. Иктыже – Мордовийын сулло поэтше Геннадий Гребенцовын марий йылме дене лекше «Лум пеледыш» сборникшын презентацийже. Йоча-влаклан пӧлеклалтше почеламут-влакым поэт, «Ончыко» журналын тӱҥ редакторжо Игорь Попов кусарен. Тудын дечын сылнымут пайрем нерген кумданрак каласкалаш йодна.
– Самырык серызе да книгам лукшо-влак дене этно-вашлиймаш Пушкин лӱмеш калыкле книгагудышто эртаралте. Марий да мордва писатель-влак коклаште кыл ийла дене пеҥгыдем толын, тиде сай йӱлам кызытат кучаш тыршена. Мутлан, мордва поэт Геннадий Гребенцовын, Рая Орлован почеламутышт-влакым, кусарен, шукерте огыл «Ончыко» журналыште савыктышна. Мордва-эрзя йылме дене лекше «Чилисема» йоча журналыштын пытартыш номерыштышт вич серызынан: Светлана Архипован, Анатолий Тимиркаевын, Геннадий Оярын, Юрий Соловьевын да мыйын – произведенийна-влак нунын йылмышкышт кусаралтын печатлалтыныт.
«Мордовийын этнокультур поянлыкше» секцийыште сылнымут кыл, марий литературышто да книга савыктыш пашаште мо ышталтме нерген палдаренам. «Кугарня» газет редакцийын пашаеҥже Татьяна Попова тӱрлӧ изданийын журналистышт дене вашлийын мутланен, – лие раш вашмут.
Йошкар-Оласе 30-шо №-ан йочасадыш коштшо Дарья Попова «Лум пеледыш» книга гыч почеламутым марла да рушла лудын пуэн. Тылеч посна 2-шо №-ан школын тунемшыже-влак ты авторынак сылнымутшым видеойӧн дене йоҥгалтарымышт дене куандареныт, туныктышышт Людмила Алексеевалан таум ойлыман, палемдыш Игорь Попов.
Лидия СЕМЕНОВА
Снимкыште: Мордва республиканский йоча библиотекыш унала мийымышт годым: Г.Гребенцов, Даша, книгагудо пашаеҥ Раиса Куркина, Игорь ден Татьяна Поповмыт.
Фотом книгагудын соцлаштыкше гыч налме
