28 октябрьыште Марий Эл Республик Кугыжаныш Погынын 28-ше сессийже эртен. Тудын кышкарыштыже депутат-влак шым йодышым онченыт: молодёжный политике нерген у законым пеҥгыдемденыт, республикын кызытсе да шушаш кок ийысе бюджетышкыже, тыгак южо еҥлан социальный полыш ден социальный обслуживаний нерген законыш тӧрлатымаш-шамычым пуртеныт.
Пеҥгыдемдыме закон дене келшышын, республикын бюджетшым чыла кум ийлан кугемдыме. 2021 ийыште регионын бюджетше 3848,4 млн. теҥгелан кугемын. Роскотымат тиде суммыланак кугемдыме. Дефицитын кугытшо вашталтын огыл.
Шушаш кок ийлан доход ден роскот ужаш-влакым кугемдыме: 2022 ийлан – 299,4 млн. теҥгелан, 2023 ийлан – 833,9 млн. теҥгелан. Тыгодым бюджетын профицитше огеш вашталт.
Тений 3 гыч 7 ияш марте йоча-шамычлан тылзе еда палемдалтше выплатым тӱлаш, ешыште кумшо да тылеч моло икшыве шочмылан выплатым ойыраш, общеобразовательный организацийлаште у вер-влакым ышташ, пеҥгыде коммунал торым посна погаш контейнер-шамычым налаш субсидийым кугемдыме. У коронавирус инфекций дене черланыше пациент-шамычлан эмым налаш, модельный муниципальный библиотеке-шамычым ышташ, кокла профобразований организацийлаште преподаватель-влаклан классный руководствылан (кураторствылан) вознагражденийым тӱлаш бюджет-шамыч кокласе трансфертым кугемдыме.
674 млн. теҥге калыкым аварий лӱдыкшан пӧртла гыч кусараш ойыралтеш, 13 млн. теҥге – Кугу Ачамланде сарын ветеранже-влаклан илыме верым ситараш.
Бюджетыште тений 1 сентябрь гыч бюджет сфер пашаеҥ-влакын окладыштым 1,05 пачаш кугемдымым, калыклан социальный выплатым тӱлаш, тӱнен илыше граждан-шамычлан полышым пуаш кӱлмымат шотыш налме.
Корно фондын роскотшым 417,8 млн. теҥгелан кугемдыме, муниципальный образований-влаклан финанс полышым – 1,2 млрд. теҥгелан.
Депутат-влак эртыше ий мучаште пеҥгыдемдыме «Россий Федерацийыште молодёжный политике нерген» федеральный законлан келшышын ямдылыме «Марий Эл Республикыште молодёжный политике нерген» у законым сайлан шотленыт.
Сессийыште «Марий Эл Республикыште посна категорий граждан-влаклан социальный полыш ден социальный обслуживаний нерген» Марий Эл Республикын законышкыжо вашталтышым пуртымо нерген» законым ончымо да регионысо социальный обслуживаний организаций-шамычын пашаеҥыштлан полшымо мере-влакым рашемдыме.
Документ дене келшышын, социальный обеспеченийын кугыжаныш тӧнежшын штатыштыже тӱҥ паша верым айлыше, ялыште але посёлкышто илыше да пашам ыштыше социальный пашаеҥ-влаклан илыме да коммунал услугылан тӱлымӧ роскотым пӧртылташ тӱҥалыт.
Социальный пашаеҥ-влакым кугыжаныш медицине тӧнежлаште, шуко функциян да единый расчётный рӱдерлаште служебный обязанностьым шуктымышт годым эн ончычак обслуживатлаш кӱлмӧ нерген посна возымо.
Парламентарий Марий Элым вуйлатыше Александр Евстифеевын регионын образований да науко министржлан Лариса Ревуцкаян кандидатуржым темлымыж дене келшен.
Тымарте Лариса Анатольевна Йошкар-Ола администрацийым вуйлатышын алмаштышыжлан, образований виктемын начальникшылан ыштен. «Россий Федераций тӱшка образованийын почётан пашаеҥже» знак дене палемдалтын.
Л.Ревуцкая депутат-влакын йодышыштлан вашештен. Тыгодым тудо кадр политикыште верысе специалист-шамычлан эҥерташ шонымыж нерген ойлен. Лариса Анатольевнан образований да науко министрлан кандидатурыж дене 30 депутат келшен, латкумыт тореш улмыжым ончыктен.
Тыге, Марий Эл Республик Кугыжаныш Погынын 28-ше сессийыштыже депутат-шамыч республик кӱкшытан кум закон ден Кугыжаныш Погынын 10 пунчалжым пеҥгыдемденыт.
М.ИВАНОВА
