Республиканский коваште-венерологический диспансерын специалистше-влак Меланомым диагностироватлыме тӱнямбал кече вашеш «Шочмо палетым терге» акцийым эртарат.
Врач-шамыч Йошкар-Оласе Патриарший площадьыште (Курчак театр воктене) кумылан чыла еҥым дерматоскопий йӧн дене чылт яра тергат.
Тиде акций ынде кумшо ий эртаралтеш. Тушко оласе калык веле огыл, ялысе-шамычат кумылын ушнат. Кажне акцийыште тӱжем утла еҥ шке шочмо палыжым тергыкта, а дерматовенеролог-влак коваште рак да меланомо дене черланышыла койшо пациент-шамычым рашемдат да нуным онколог-влак деке келгынрак тергалташ колтат.
Тений коваштын тазалыкшым 25-27 майыште 9 гыч 13 шагат марте тергыкташ лиеш.
М.ИВАНОВА
