Тений сентябрьыште республикыште регион да муниципал кӱкшытан сайлымаш-влак лийыт.
Нунылан ямдылалтмаш кузе кайыме нерген Марий Элысе Общественный палатын еҥже, республикысе Мер эскерымаш штабын экспертше Лариса Овчинникова тыге палдара:
– 2024 ийыште Единый йӱклымӧ кече 8 сентябрьыште лиеш. Но чынже дене икмынярымше ий почела тудо кум кече шуйна. Тыге шуко моло регион семынак тений республикыште сайлымаш 6 — 8 сентябрьыште эрта. Практике ончыкта: тиде – моткоч келшыше формат. Избиратель-шамычланат йӧнан. Мутлан, еҥ-влак кугарнян йӱклен да дачышкышт ласкан каен кертыт. Тыге шуматкечым да рушарням шонымышт семын эртарат. А кӧ нигушкат огеш кае да огеш вашке гын, кумыт кокла гыч кеч-могай кечынже йӱклен кертеш.
Марий Элын сайлымаш комиссийыштыже 24 июнь гыч 24 июль марте кандашымше созыв Кугыжаныш Погыныш сайлымашыш ушнаш депутат-влакым темлаш да регистрироватлаш документ-влакым налыт.
Рӱдолаште региональный парламентыш сайлымаш дене пырля эше Йошкар-Ола оласе Погынымашыш депутат-влакым сайлымаш эрта.
Л.Камалетдинова
