26 ноябрьыште С.Г.Чавайн лӱмеш калыкле книгагудышто «Лудшын кечыже» эртаралтын. Тудо республикыште эн тошто да эн тӱҥ книгагудым почмылан 145 ий теммылан пӧлеклалтын. Толшо-влаклан эн ондак видеэкскурсийым ончыктышт, тыгеат лиеда улмаш – йӧратыме книгагудына шкеж нерген чонан айдемылак каласкалыш! Залыште шинчыше кажне еҥже, очыни, уш-акылым пойдарыше ты пӧртын неле омсажым почын пурымыжым шарналтыш: кӧ книгам налаш, кӧ шанче пашам возаш, а кӧжӧ таҥжым вашлияш толын… Тачысе кечылан тыште 1,5 миллион экземпляр савыктыш аралалтеш, 38 тӱжем утла лудшыжо уло. Мыланна, марий-шамычлан, чонланна утларакше краеведений пӧлка лишыл, тыште 23 тӱжем экземпляр книга, газет да журнал-влак шке лудшыштым вучат.
Тиде кечын «Книгагудо – мыйын илышыштем» конкурсым иктешлышт. Тӱрлӧ номинацийыште сеҥыше-влак коклашке Н.Соколова («Книгагудо да профессий»), Т.Петрова («Шке, книга да книагугдо нерген»), В.Востриков («Книга-гурман»), И.Добролюбова («Книгагудо да усталык»), Л.Аммосова («Книгагудын ӱшанле еҥже») да молат логальыч, нуно диплом да пӧлек дене палемдалтыч.
Теве книгагудын директоржо Ирина Щеглова (снимкыште) «Почётан лудшо» (1988 ий гыч ойырат) лӱм дене палемдаш тӱҥале. Ты кечын 6 эн чолга лудшо тиде радамыш ушныш: талантан сӱретче, график Мария Клюкина, шанчызе-историк Анатолий Муравьев, писатель Марина Копылова, библиотеке пеленысе «Беседка» клубын еҥже, поэт Владимир Подоплелов, библиограф, «Марий сандалык – марийский мир» журналын тӱҥ редакторжо Валерий Мочаев да педагог Антон Тресцов. Нунын ӱмырашлык именной манме билетышт лиеш, а оҥышкышт йошкар тӱсан знакым пижыктышт.
– Мый 1963 ий годсо лудшо улам, тунам икымше гана Шернур район Кукнур библиотекыш толынам. Вара Звенигово оласе, Ленинград областьысе Пушкино книагудо-влакын лудшышт лийынам. Мо оҥайже, Чавайн лӱмеш книгагудыш Йошкар-Олаште редакцийыште ышташ тӱҥалмеке гына корным почынам. Каласем, ты чапле полатын шӧрлыкыштыжӧ мыйын ямдылыме 7 книга кия, – каласыш В.Мочаев.
«Лудшын кечыже» маналтеш, а тудо пайрем гаяк эртыш. Ятыр сылне муро, почеламут (лач книгагудылан пӧлеклалтше!) йоҥгалтыч. Лудшо-влакат пайремыш толшылак моторын чиеныт, икте-весышт дене вашлиймыштлан куаныштым шылтен ышт керт. Кажнылан костенечым ямдыленыт: «Мо гын тушто?» манын, изи мешакым почын ончалде шым чыте – изи магнит да изи шоколад, сӱретыште – С.Г.Чавайн лӱмеш книгагудына.
Л.СЕМЕНОВА
Фотом С.Г.Чавайн лӱмеш книгагудын сайтше гыч налме
