Регионыштына илыше вич еҥ «Кадр» национальный проектын полшымыж дене Марий чодыра озанлык техникумышто лесоводлан яра тунем лектын.
Выпускник-шамыч кокла гыч иктыже – боевой действийын ветеранже, лӱмын эртарыме сарзе операцийын участникше.
– Тунемме программе пеш поян ыле. Теорий ден опытан наставник-шамычын вуйлатымышт почеш эртаралтше практике чодыра озанлыкыште лачшымак кузе пашам ышташ кӱлмым сайын почын пуэныт. Лишыл жапыште лесничествыш пашаш пураш шонем, тушто пайдале лиям манын ӱшанем, – шонымашыж дене палдарен Константин Рычков, курсын выпускникше, СВО-н участникше.
Тений «Кадр» национальный проектын полшшымыж дене регионна гыч 300 наре еҥ кугыжаныш кӱшеш у профессийым налын але квалификацийым нӧлтен.
Профессийлан тунемаш але ешартыш профессиональный образованийым налаш шонышо-влак йодмашым «Работа России» порталыште ( trudvsem.ru/information/pages/support-employment) пуэн кертыт, палемдат Марий Элын Паша да социальный аралтыш министерствыштыже.
Маргарита ИВАНОВА.
Марий Элын Паша да социальный аралтыш министерствыжын пресс-службыжын фотожо.
