27 мартыште Я.Эшпай лӱмеш Марий кугыжаныш филармонийын концерт залыштыже Самырык педагог ден наставник-влакын «Великой Победе посвящается!» республик кӱкшытан XII усталык фестивальышт эртен.
Мероприятийым Марий Элысе Профсоюзын регионысо организацийже эртарен. Тушко фестивальын муниципальный йыжыҥыштыже сеҥышыш лекше образовательный организаций-влак республикнан чыла олаж ден районжо гыч толыныт.
Конкурсын положенийже дене келшышын, самырык педагог ден наставник-шамыч шке мастарлыкыштым вич номинацийыште ончыктеныт. Сеҥышыш лектыныт:
«Мурымаш» номинацийыште – У Торъял посёлкысо школын 20 еҥан хоржо. Тиде коллектив «Венский вальс» мурым тӱрлӧ йӱк дене мурен;
«Сценысе постановко» номинацийыште – Юрино посёлкысо С.А.Лосев лӱмеш школын усталык коллективше «Памятник от слова память» инсценировкыж дене;
«Декламаций» лноминацийыште – Волжск оласе 1-ше №-ан школын дуэтше. Самырык педагог-влак Олег Беляев ден Татьяна Мишина Роберт Рождественскийын «120 шагов» поэмыж гыч «Война» почеламутым чоныш логалтен лудыныт;
«Куштымаш» номинацийыште – Килемар профсоюз организацийын Арде школысо коллективше. Тудо «Журавли» композицийым ончыктен;
«Фронтысо агитбригаде» номинацийыште – Марий Турек профсоюз организацийын Хлебниково школысо коллективше «Культура – фронту!» программыж дене.
Сеҥыше-шамычлан диплом ден шергакан призым кучыктеныт, моло участникым таумут да лӱмын ямдылыме приз дене палемденыт.
Кугу Отечественный сарыште сеҥымылан пӧлеклалтше тиде фестиваль конкурс шотан лийын гынат, ик шӱлыш дене эртен, участник-влак икте-весыштлан совым рӱж кыреныт, икоян улмыштым эсогыл кынел шогалын ончыктеныт. Тыгаяк лийшаш йочалан пример – самырык педагог да наставник!
Маргарита ИВАНОВА
Ирина АБАКУМОВАН фотожо
