Марий Элын Ялозанлык да кочкыш сату министерствыжын уверже почеш, апрель мучашлан икияш пырчан да отызан кушкылым 60 тӱжем гектарыш вераҥдыме. Тидыже ӱдышаш чумыр кумдыкын 40 чоло процентше лиеш.
Тений озанлык-влак кушкыллан ешартыш кочкышым пуышаш минеральный ӱяҥдышым кондымо пашам сайын виктарен колтеныт. Тыге але марте 25,4 тӱжем тонным кондымо да планым 104 процентлан темыме. Кодшо ийын тиде жаплан 17,2 тӱжем тонным шапашлыме.
Кызыт республикнан пасулашкыже 1815 тракторым лукмо. Тышечын 1602 агрегат мландым пушкыдемда, 555 сеялке ӱда. Кылмаш курал кодымо 130 наре тӱжем гектар мландым тырмалыме.
75 тӱжем гектар пасум икияшым ӱдаш тӱрыс ямдылен шуктымо. 42,6 тӱжем гектар кокияш озымлан, але чумыр кумдыкын 97 процентышкыже, ӱяҥдышым шавыме. 28 процент шукияш шудо ешартыш кочкышым налын.
Шошо агаште Медведево, У Торъял, Советский район-влак ойыртемалтыт. Тыште икияшым пӱтынь кумдыкын 65-60 процентшым ӱденыт.
Снимкыште: У Торъял районысо «Первый май» колхозышто куатле технике пашам ышта.
Фотом Ялозанлык да кочкыш сату министерствын сайтше гыч налме.
