Йошкар-Оласе медицине колледжыште выпускник-шамычым пашаш налме шотышто комиссийын заседанийже эртен.
Марий Элыште кокла медицине пашаеҥ-влакым Йошкар-Оласе медицине колледж гына ямдылен луктеш. Тыште ончыкылык медик-шамыч «Эмлыме паша», «Акушер паша», «Сестринский паша», «Лабораторный диагностике», «Фармаций» да «Стоматологий ортопедический» специальностьла дене шинчымашым налыт. Кызытсе педагогический да информационный технологий дене тунеммышт годым тренажер, компьютер технике, электрон учебник дене лÿмын оборудоватлыме базыште, тренажер залыште да библиотекыште пайдаланат. Тылеч посна кажне студент массаж, эмлыме физкультур, косметологий курс-влакым эртен кертеш.
Тиде заведенийын выпускникше-влаклан паша рынкыште конкурент уке гаяк, молан манаш гын нуным марий здравоохраненийын заказше почеш ямдылат. Пашам пуышо-шамычын палемдымышт почеш, медколледжым тунем пытарыше специалист-влак сай шинчымашышт да практикышт дене ойыртемалтыт.
Тений колледжым 329 студент тунем пытара: 305 – Йошкар-Олаште, 24 – Волжскышто.
Комиссийыште республикысе медорганизаций-влакын у кадрым пашаш налаш шонышо вуйлатышышт ден «Акушер паша», «Эмлыме паша» да «Сестринский паша» специальностян 295 студент лийыныт. Тылеч ончыч 23 выпускниклан фармацевтический организацийлаште пашам темлыме.
Кеҥеж лишан выпускник-шамычын лачшымак могай организацийым ойырен налмыш раш лиеш, но кызытеш 32 специалист Республиканский клинический больницыш каяш кумылым ончыктен, 26 – Йошкар-Оласе 2-шо №-ан поликлиникыш, 26 – Перинатальный рÿдерыш, 24 – Йоча республиканский клинический эмлымверыш, 20 – Йошкар-Оласе 1-ше №-ан медсанчастьыш, 20 – Йошкар-Оласе йоча больницыш, 19 – Йошкар-Оласе 1-ше №-ан поликлиникыш. 17 выпускник Медведево районысо рÿдö больницыште пашам ышташ шона, 6 – Волжск оласе рÿдö эмлымверыште, 6 – Марий Турек районысо рÿдö больницыште. Моло районыш пашам ышташ каяш кумылан еҥ лектын огыл. Тидыже медорганизацийлам вуйлатыше-влакын самырык специалист-шамычым ялысе эмлымверыш мияш мынярак кумылаҥден моштымышт денат кылдалтын, очыни…
Икманаш, ончыкылык медик-влакын чон пыштен пашам ыштыме верым ойырен налме шотышто жапышт эше уло, но ÿшаныме шуэш: чыланат шочмо республикланна пайдале лийыт.
М.ИВАНОВА
