Возенна ыле: избирательный комиссий-влакын еҥышт 17 февраль гыч 7 март марте сайлыше-шамыч деке мӧҥгышкыштак мият да сайлымаш нерген каласкалат.
Тиде кампаний кодшо шуматкечын тӱҥалын. Вич кече жапыште, мутлан, Кужэҥер районысо Лаждӱр кундемыште УИК-ын еҥже-влак мыняр суртышто лийыныт? Умылтарыме паша кузерак кая? Калык нуным кузерак вашлиеш? Тиде да моло нерген 305-ше № избирательный участкын председательже Римма Глушкова (снимкыште шолаште) тыге каласкалыш:
– Мемнан избирательный участкыш Кугу Лаждӱр, Изи Лаждӱр, Олма почиҥга, Кожласола, Кӱшыл Нольдӱр, Осыпъял пурат. Нине куд ялыште 210 пӧртыш миен толшаш улына. Тушко ме кумытын коштына. Кок кече почела кок еҥ каена, кумшо кана, вара вес кок еҥ каят, икымшыже кана. Паша радамыште тыгак палемдалтын. Тыге 17 февраль гыч тӱҥалын 1 март марте коштына. А кӧмыт тӱрлӧ амаллан кӧра ты жапыште комиссий пашаеҥ-влакым пуртен огытыл, нунын деке икымше гыч шымше март марте уэш миен толына. Мемнан дене але марте тыгайже – 15 сурт. Яллаште чыланат ваш-ваш палена, сандене пӧрт еда коштмо годым кугу нелылык огеш вашлиялт. Пий-шамыч веле чаракым мыняр-гынат ыштат. Но яллашке сурт еда мемнам лӱмын ойырымо машина шупшыкта, да ты шотыштат йолын коштмо годымсо гайжак лӱдыкшӧ огыл. Избиратель-влак кокла гыч мӧҥгыштӧ йӱклаш таче марте 37 еҥ кумылым ончыктен да йодмашым возен. Тиде тӱҥ шотышто чылан гаяк илалше еҥ-шамыч улыт.
Любовь Камалетдинова
Фотом интернетысе соцкыл гыч налме
