Россий – тӱнямбалне эн кугу эл. Тудын кумдыкшо кеч-могай вес кугыжанышын деч кугурак. Элна 18 кугыжаныш дене чеклана. 190 тӱрлӧ утла калык тыште ваш келшен ила. Марий калыкнат – тиде кугу ешын ик изи ужашыже. Пытартыш перепись почеш 423803 улына. 245560 еҥже Марий кундемыште ила гын, молыжо адакат уло элна мучко шаланен пытеныт. Но ме таче марте шке ойыртемалтше йылмынам, тӱвыранам да йӱланам арален коденна. Да чыла тидым кеч-куштат кугешнен ончыктен кертына.
А ончыкташ амалже эре уло. Теве кодшо кечылаште Москвасе ВДНХ-ште «Путешествуй» VI тӱнямбал турист форум почылтын. Тушко уло Россий гыч 2,5 тӱжем участник миен. Марий Эл гычат изи огыл делегаций каен да турист куатше дене палдарен. Республикын стендше ВДНХ-н рӱдыштыжак верланен. Рушарня марте тудым ончал савырнаш лиеш. Мом вара тушто ончыкат? Туроператор, ты сферыште ыштыше специалист-влак Марий Элысе эн сай турист маршрут-влак дене палдарат. Республикыште ыштен лукмо кочкыш дене сийлат, тӱрлӧ мастер-классым эртарат. Калык вургемым «чиен» войзалташ йӧным пуышо фотозоно пашам ышта.
Форумышто поснак ойыртемалтше мероприятий-влак 12 июньышто эртат улыт. Мемнан участник-влак марий калык кочкыш – команмелна – дене чылаштым сийлаш тӱҥалыт.
Марий Эл вуйлатыше Юрий Зайцев МАХ каналыштыже серен: «Марий Элын стендше деке шуко калык толмо эше ик гана пеҥгыдемда, республикыште туризм сайын вияҥеш. Кодшо ийыште гына 1,3 миллион еҥ толын каен. А корно инфраструктурым саемден толмылан кӧра турист ден экскурсант-влакын чотышт эшеат кушшаш».
Республикын промышленность, экономике вияҥмаш да сатулымаш министрже Владимир Халюзинын шке воткылыштыже увертарымыж почеш, форум кышкарыште «Время путешествовать: многообразие впечатлений, доступное каждому» пленар погынымыш да РФ-н Туризм шотышто Кугыжаныш Советшын комиссийжын заседанийже эртеныт. Тӱҥ каҥашыме йодыш элкӧргысӧ туризмым вияҥдыме дене кылдалтын. Ты форум «Туризм да унам вашлиймаш» нацпроект кышкарыште эрта.
Снимкыште: Марий Элын стендеше воктене.
Фотом «Туризм в Республике Марий Эл» воткыл лаштык гыч налме.
