Ираида Степанован вуйлатыме Марий тӱр рӱдер 2023 ийым Марий калык вургем ден сӧрастарыш идалык семын увертарен.
«Кугезына-влак шкеныштым кузе сӧрастарымым ме шагал палена. Мом чиеныт? Молан лач тыге чиеныт? Вургемым кӧ ыштен? Сӧрастарышлан мом кучылтыныт? Ожнысо сӧрастарыш-влак нерген умылымашна кызыт еҥ-влакын ӱмбалнышт ужмо гыч гына шочеш. А чыла тидым пален налаш моткоч оҥай лиеш. Шкем сылныракым ышташ тыршыме кумыл эре лийын. Тугеже калыкнан сӧрастарышже-влак дене кылдалтше теме эре тургыжландара. Мутлан, Йошкар-Оласе Историй да археологий тоштерыште тидлан пӧлеклалтше лӱмын экспозиций уло. Кажныже тудым шке шинча дене ужын, да экскурсоводын каласкалымыжым колыштын кертеш», – палемда Ираида Степанова.
Марий тӱр рӱдер чыла кумылан-влакым ты идалыклан пӧлеклалтше мероприятийлаш ушнаш ӱжеш. А тиде – тӱрлӧ усталык мастерской, верлаште вашлиймаш, акций… Организатор-влак ты идалыкым ноябрьыште этнофорум дене иктешлаш палемденыт.
Снимкыште: Татарстанысе Улисъял гыч Лиана Фёдорова кугезыже-влакын марий вургемыштым да сӧрастарышыштым чумыра, шкежат ышта.
С.Носова
Авторын фотожо.
