Тудым вашлийме икмыняр йӱла дене Йошкар-Оласе марий юмыйӱла общинын онаеҥже Юрий Тушнурцев палдара:
– Кугече Юмо – тиде кумылын озаже. Пайремын ик ужашыже тоштыеҥ-влаклан пӧлеклалтеш, весыже – ты тӱняште илыше-влаклан. Кугече арнян изарнянже тоштыеҥ-шамычын пайремыштым палемдена. Ошыгечынже мончаште мушкылтын, яндар вургемым чиена. Тоштыеҥ-шамычымат мушкылт лекташ ӱжына, нунылан солыкымат сакена. Сорта кечын чесым поген, эн ончыч Сурт Юмылан сортам чӱктена. Варажым, тудлан пелештымеке, сортам йӧртена да тоштыеҥ-влакым ушташ тӱҥалына. Эн ончыч вес тӱнян тӧражлан, вара вес тӱняш кайыше эн лишыл еҥ-влаклан да молылан сортам чӱктена. Но 19 сорта деч утыжым чӱктыман огыл. Сортажым пу оҥашкат, шӱрашан кӱмыжышкат вераҥдаш лиеш. Оҥажым вара йӱлалтыман, а шӱрашыжым – кайыклан пукшыман. Сорта йӱлен пытымеке, тоштыеҥ-влаклан тауштен, нуным ужатен колтыман.
Кугече арняште мушкедаш, ӱпым тӱредаш, кӱчым пӱчкедаш, оксам кӱсын пуаш да налаш ок темлалт.
Кугечылан ожнысек моло чес дене пырля комбо шылым ямдыленыт. Тудын шылже гыч шӱрашан шергом когыльым лӱмын ыштеныт.
Снимкыште: Ю.Тушнурцев.
С.Носова
