Пытартыш жапыште газетыштыда у коронавирус инфекций нерген пеш шагал возеда. Але вара COVID-19 чакнен?
Н.Николаева
Параньга район
Йодышлан «Марий Эл» газет редакцийын тазалык аралтыш да социальный илыш йодышла дене редакторжо М.ИВАНОВА вашешта:
– Газетым лудын шогымыланда, у коронавирус инфекций дене кылдалтше сӱретым эскерымыланда мокталташ гына кодеш, пагалыме Н.Николева. Чын, эртыше жап, поснак 2022 ий тӱҥалтыш дене таҥастарымаште таче кечылан COVID-19 палынак чакнен. Тидымак шотыш налын, черын шарлымыжлан кӧра пуртымо чыла чаракым ик жаплан официально кораҥдыме ыле. Регионын тазалык аралтыш министржын алмаштышыже Татьяна Бастракован 28 июльышто палемдымыж почеш, Марий Элыште у коронавирус инфекций дене кылдалтше сӱрет куандара, но Российын шуко регионыштыжо калыкын угыч черланаш тӱҥалмыжым шотыш налын, медицине организацийлаште маскым чияш пунчалме. Тыгеже чер нигушкат каен огыл, тудо тӱткышым луштарымынам гына вуча, очыни. Моло кундемыште вес койышым налын озаланаш тӱҥалмыжым уже регистрироватлат. Сандене республикыште илыше кажне еҥым COVID-19 деч ревакцинацийым эрташ але прививкым ыштыкташ ӱжам.
А Роспотребнадзорын Марий Элысе виктемжын увертарымыж гыч, Марий Элыште, мутлан 26 июльышто, у коронавирус инфекций дене 7 еҥ (6 ӱдырамаш да 1 пӧръеҥ) черланен, пандемий пагытыште – 44895 граждан.
