КУЧЕМЫШТЕ УВЕР ЙОГЫН

КОРНО ТУТКАРЫМ ЭШЕАТ ШАГАЛЕМДЫМАН

Йолешке-влакын корным вончымо 197 верым у лӱдыкшыдымӧ национальный стандарын йодмыж почеш келыштараш – теве тыгай задачым шынден Марий Эл вуйлатышын пашажым жаплан шуктышо Юрий Зайцев.

Тенийысе идалыкын пел ийыштыже корно да транспорт азап нерген тургыжланен ойлымыж годым тудо палемден: «Колышо-влакын чотышт шукемеш, тыгай сӱрет кумылым волта. ДТП лиймым шагалрак регистрироватлыме, а колышо-влак шукырак улыт».

Республикын транспорт да корно озанлык министрже Александр Герасименко тыгай цифр-влакым каласен: икымше пелийыште тений 237 корно азап лийын, тидын годым 42 еҥын ӱмыржӧ лугыч лийын. Ӱмашсе дене таҥастарымаште ДТП-ште колышо-влакын чотышт 55,6 процентлан кушкын. Аварий утларакшым транспорт-влакын ваш тӱкнымыштлан, пешеход-влакым тошкымылан да иктаж вере миен керылтмылан кӧра лиеда.

«Республикыште йолешке-влакын корным вончымо 1040 верым у национальный стандартын йодмыж почеш шотыш кондыман, тышеч 70-же – региональный, 72-шо – федеральный да 898-же верысе кӱлешлыкан улыт. 2021 ийыште стандарт почеш йолешке-влакын вончымо 253 верым келыштарыме, 77 переходшо шинчымашым пуышо организаций дек вончештарыме корнышто вашлиялтеш», – палемден Александр Герасименко.

Корно туткар лиймым шындарыме шот денак республикыште моло мероприятий, мутлан, «шокшо линий», «Нетрезвый водитель» акций эртаралтыт.

Л. КАМАЛЕТДИНОВА, Л.СЕМЕНОВА

Д.РЕЧКИНЫН фотожо

 

Опубликовать в Одноклассники

Добавить комментарий