Пытартыш жапыште кажне кечын манме гаяк лум чотак луммылан кӧра корным шӱкымӧ шотышто республикыште ятыр вере нелылык лектеш.
Мутлан, У Торъял районысо Тошто Торъял ял шотан илемыш 29 ял пура. Поселений вуйлатыше Н.Широбоковын палдарымыж почеш, лумым шӱкаш нунылан районысо «Первый май» ден «Онар» озанлык-влак кажныже ик Т-150 трактор гыч ойырат. Южгунамже тидлан «Первый май» колхоз деч кугурак техникымат йодыт.
– Корным кажне ялышкак да илемласе уремламат шӱкаш тыршена. Но южгунамже кӱлеш семын шотыш конден огына шукто. Тидлан кӧра вуйшиймаш-влакат пурат. А мемнан эшежым вашке лимит пыта. Ты амал дене лумым шӱкымым чарнен да шогал кертына. Тунамже кузе лийман – эше огына пале. Сандене тиде – кугу йодыш. Такшым оксам корно фонд гыч район ойыра, – палдарыш Николай Широбоков.
Ӱшанена: ты ял шотан илемыште чылт тыгай мартежак огыт шу да окса ойыралтеш. Вет корно деч посна ялтат огеш лийыс!
Любовь Камалетдинова
