Марий Эл Кугыжаныш Погын председательын икымше алмаштышыже Лариса Яковлева 30 сентябрьыште Волжский районыш шке избирательный округышкыжо миен.
Ты кечын «Единый Россий» партийын Волжский районысо отделенийжын верысе политсоветшын еҥже-влак дене совещаний лийын. Тушто Волжский муниципал округын икымше созыв Депутат-влак погынымашыш сайлымашын иктешлымашыжым ыштеныт, тыгак депутат-влак группым чумырымо, тудын да Депутат-влак погынымашын вуйлатышыштлан кандидатур-влак дене кылдалтше йодышлам каҥашеныт.
Лариса Яковлева шке коллегыже-влакым кандашымше созыв Кугыжаныш Погынын ик ий жапысе пашаже, тӱҥ законодательный темлымаш-влак да республикыште партийный проект ден программе-влак илышыш кузе пурталтме дене палдарен.
Тыгак депутат Волжский районышто Мер Каҥашын еҥже-влак дене вашлийын. Тушто верысе калыкын тӱҥалтышыжлан полышым пуымо, муниципал округым социально-экономически вияҥдыме нерген мутланеныт.
Лариса Яковлева еҥ-влаклан приемымат эртарен. Мутлан, Карай кыдалаш школышто «Учебно-методическое обеспечение этнокультурной составляющей образовательной деятельности» проектын вуйлатышыже Любовь Сергеева дене Российын «Гордость нации – 2025» Всероссийский общественный премийжым налшаш верч конкурсыш ушнышаш дене кылдалтше йодышым каҥашеныт.
- Любовь Камалетдинова
