Эртыше арнян Марий Элыште коля йӱштымужо дене 10 еҥ черланен, палдара Роспотребнадзорын Марий Элысе виктемже.
Тыгай азапыш Йошкар-Олаште ныл еҥ логалын, Кужэҥер, Советский, Медведево районлаште да Козьмодемьянск олаште – икыт дене, У Торъял округышто – кокыт.
Вич еҥ суртшо коклаштак инфицироватлалтын, нылыт – сад-пакча пашам шуктымо годым, икте – чодыраште. Медик-влак «верге палан коля йӱштымужо» диагнозым эше Киров область гыч толшо ик еҥлан шынденыт.
Тиде чер айдемылан коля деч пижеш. Инфекций колян шондыжо, шуржо, шӱвылжӧ дене варналтше южышто да пуракыште кужун ила. Сандене поснак шудым солымо, кургым ямдылыме, йыраҥым сомылымо, участке гыч кошкышо кушкыл ден торым кораҥдыме годым черланен кертме лӱдыкшӧ кугу.
Тидымак шотыш налын:
• нине пашам шуктымо годым шӱлымӧ органым респиратор але вӱдыжтарыме ватке-марле повязке дене аралыман, кидыш резинке перчаткым, ӱмбалан келшыше вургемым чийыман да тудым пашам пытарымек мушман;
• инфекциян пурак умшаш ынже логал манын, паша жапыште кочман да тамакым шупшман огыл;
• пашам мучашлымек, кидым шовын дене мушман.
А эше:
• коля ынже погыно манын, илыме кумдыкым кошкышо пушеҥге да тӱрлӧ тор деч эрыктенак шогыман;
• коля логалман продуктым кочман огыл;
• коля пурен кертме верлаште кочкышым пич петырыман йоҥгытышто кучыман.
Черланымым (капкыл температур кӱзымым, вуй ден кыдал корштымым, шондо шагал лекмым) шижмек, жапым шуйкалыде, врач деке кайыман. Верге палан коля йӱштымужым стационарыште веле эмлат.
Маргарита ИВАНОВА.
Роспотребнадзорын Марий Элысе виктемжын фотожо.
