Марий каваште турийла «эре чоҥешташ» ӱжшӧ поэт-новатор, йӧратыме мутмастар Валентин Колумбын шочмыжлан 87 ий теме лӱмеш Йошкар-Олаште Колумб лудмаш эртаралтын. Тений 17 участник мастарлыкшым ончыктен, моло ийла дене таҥастарымаште, залыште улшо калыкым ончалынат, вик каласаш лиеш: шагалын ушненыт. Оласе йочасадла гыч 9 ньога лийын, марий тувырышт да сӧрастарышт дене мотор курчакла койшо ӱдыр-влак наизусть тунемме почеламутыштым пеш раш каласкаленыт. Нунын воспитательышт-влак Н.Годунова ден Э.Сидоровалан (80-шо №-ан «Ӱжара»), О.Казанцева ден С.Никитиналан (53-шо №-ан «Изи патыр»), Л.Мальцева ден И. Тимошевалан (Семёновка селасе 21-ше №-ан «Рябинушка») да О.Купцовалан (11-ше №-ан «Гнездышко») жюри лӱм дене таум ойлымо шуэш.
Школлаште тунемше-влак ондак моткоч шукын ушнат ыле, но ты гана 8-10 ияш-влак коклаште улыжат коктын (коктынат марла) лудыныт: икымше вер дене А.С.Пушкин лӱмеш 4-ше №-ан гимназийын тунемшыже Татьяна Зыкова, а кокымшо вер дене 10-шо номеран кыдалаш школын тунемшыже Иван Ефремов палемдалтыныт.
11 ияш гыч 14 ияш-влак коклаште вич участник кокла гыч И.С.Палантай лӱмеш тӱвыра да сымыктыш колледжын калыкле сымыктыш гимназийжын тунемшыже-влак марла лудмаште Дарья Юрьева (1-ше вер), Никита Калитов (2-шо вер) ойыртемалтыныт, а Максим Федоров рушла лудмаште 1-ше верыш лектын. 27-ше номеран кыдалаш школын тунемшыже-влак Карина Вайшева «Шӱм пӧлек», Максим Артизанов «Матерям» почеламутым каласкалымышт дене 2-шо верым нальыныт.
15 гыч 18 ияш марте тӱшкаште адакат коктын гына – И.С.Палантай лӱмеш тӱвыра да сымыктыш колледжын студентше-влак Мария Мельникова (1-ше вер) да Анна Новоселова (2-шо вер) – таҥасеныт манаш шотлан ок тол, ӱдыр-шамыч мастарлыкыштым ончыктеныт. Марий кугыжаныш университетын студенткыже Ирина Петрова шке возымо почеламутшым колышташ темлен.
7 ий марте марла да рушла лудшо-влак коклаште сеҥышыш лектыныт: 1-ше верыште – Маша Мамаева («Изи патыр») ден Лиза Купцова («Гнездышко»), 2-шо верыште Настя Поликарпова («Ӱжара») ден Агния Попова («Рябинушка») да 3-шо верыште – Артур Артизанов («Изи патыр») ден Семен Бирюков («Рябинушка»). Лиза Шабдарова («Ужара») ден Ульяна Калтуриналан («Рябинушка») кумылаҥдыше дипломым да пӧлекым кучыктеныт.
– Тений, ойыртемалтшын шинчалан перна, рушлаш кусарыме почеламутым лудшо-влакат ятырын лийыныт, сандене нуным посна диплом дене палемдышна. Ятыр йочасадыште да школышто марий йылмым шочмо йылме семын огыт туныкто гынат, ача-аваштын да воспитательышт-влакын тыршымыштлан кӧра йоча-шамычын чот ямдылалтмышт шижалтеш. Вес ийын конкурсыш ушнаш кумылан-влаклан иктым темлыме шуэш: почеламутым ойырен налмыда годым утларак чот кычалза, лудса, почеламутым я поэмым тичмаш огыл гынат, эн виян ужашыжым налын кертыда, вет Колумбын позийже тыгай поян! – каласен Марий тӱвыра рӱдерын пашаеҥже Людмила Кошкина.
Чыла тӱшкаште кум ончыл верым налше-влакым республик кӱкшытан Колумб лудмашлан темлаш тӱҥалыт, тудыжо 24 июньышто Морко посёлкышто эртаралтеш.
Л.СЕМЕНОВА, жюри еҥ
Р.Николаеван фотожо
