Йошкар-Оласе 2-шо №-ан полиций отделын дежурный частьышкыже 85 ияш илалше еҥ йыҥгыртен да ондалалтмыж нерген каласен.
Ойлымыж почеш, тудын деке палыдыме ӱдырамаш толын да пенсионер шамыч коклаште переписьым эртарымыж нерген увертарен. Тидлан паспортшым, а вара ик стакан вӱдым йодын. Тудын кайымекше кова оксаже йоммым ужын.
Рашемдымеке, пале лийын: пенсионеркын вӱдлан кайымыж годым саде ӱдырамаш оксан конвертым ужын. Тудыжо статуэтке йымалне киен. Йӧн дене пайдаланен, «уна» тудым писын гына налын да лектын каен. Тыге илалше еҥ 15 тӱжем теҥге оксаж деч посна кодын.
- Тыгайрак сынан туткарыш рӱдолаштак илыше 82 ияш пенсионерке логалын.
- Тудын деке толшо ӱдырамаш социальный пашаеҥ улмыж нерген каласен да улшо оксам уэмдаш кӱлеш манын ойлен. Тидлан улшо 5000 теҥгеаш кагаз оксаже-влакын кажныжын номерыштым возен налман манын увертарен. Кунам кова нуным конден, ӱдырамаш возен налшын койын, а вара шояк документыш кидпалыжым пышташ кӱштен. Пенсионерке тыгак ыштен, а оксажым паспортшо кӧргышкӧ пыштен. Тылеч вара «соцпашаеҥ» эше вес документ-влакым кондаш йодын. Кован нуным кычалмыж жапыште ӱдырамаш оксажым налын да пачерже гыч лектын ошкылын. Кайымекше, илалше еҥ 20 тӱжем теҥге оксаже йоммым умылен.
Оперативно-кычалме пашам эртарымеке, уголовный розыск пашаеҥ-влак нине кок преступленийымат Киров область гыч ончыч судитлалтше 34 ияш ӱдырамашын ыштымыжым рашемденыт.
Кызытсе жаплан полиций пашаеҥ-влак шолыштмо оксажым тудын деч поген налыныт.
Тиде факт шотышто уголовный делам тарватыме.
Полиций пашаеҥ-влак тыгай туткар лийын кертме нерген чылаштымат илалше лишыл еҥыштым шижтараш ушештараш йодыт:
- пачерыш, пӧртыш палыдыме еҥым пуртыман огыл;
- палыдыме еҥ-влаклан оксам пуыман огыл;
- мошенник-шамыч омсашке тӱкален да банк але социальный пашаеҥ-влак улмо нерген ойлен кертыт. Тидлан ӱшаныман огыл;
- окса реформо дене келшышын тошто оксам улан вашталташ темлат гын, тиде – шоя. Элыште кызыт нимогай окса реформо огеш кай. Тылеч вара чын окса олмеш нуно шоя кагазым пуэн коден але шолышт каен кертыт;
- палыдыме еҥ-шамычлан мыняр окса улмым ойлыман огыл;
- улшо оксам ик верыште аралыман огыл.
Л.Камалетдинова
Авторын фотожо
