Ончычсо дене таҥастарымаште кызыт йоча-влак мӧҥгылан пуымо урокым моткоч писын ыштымыштла чучеш. Мутат уке, цифран технологийланат нуно эҥертыде огыт керт. А ме жапше годым пелйӱд марте манме гай книгам лудмо, тӱрлӧ задачым, примерым решатлыме… Йолташ-влак, йочада-влаклан мӧҥгысӧ пашам ышташ полшеда? Тунеммыда годым кугурак-влакын полышыштлан эҥертенда мо? Ача-ава икшывылан урокым ышташ полшышаш мо, кузе шонеда?
Наталия МИХАЙЛОВА, Национальный сымыктыш гимназийын педагогшо, музыкант:
– Але икшывем изи, садлан чыла тиде эше ончылно. Кодшо гана тукым шольымлан шукемдымашан таблицым тунемаш полшышым.
Ача-ава икшывылан мӧҥгысӧ пашам ышташ огыл, а умылтараш полшышаш, вет иктаж заданийым умылыде кодеш гын, умбакыже тудлан неле лиеш. Адакшым урокым ыштен шуктымекыже, терген лекташат уто огыл. Почеламутым, иктаж правилым пырля тунемаш, книгам лудаш моткоч кӱлешан шонем.
Мый интернат-школышто тунемынам, садлан мӧҥгысӧ пашам ыштымынам воспитатель-шамыч тергеныт. Нунын дене пырля книгам лудмо да содержанийжым каласкалыме кызытат порын шарналтеш. А каныш кечылан ялыш мийымеке, ача-авам эреак тергеныт. Авам педагог лийын, садлан урокым ыштыме, темым умылымо шотышто нелылык лийын огыл.
Екатерина КОЖЕВНИКОВА, «Марий» сийгудын пашажым виктарыше:
– Тӱҥалтыш класслаште тунеммышт годым урокым ышташ пелашем дене коктын полшенна. Лач тунам нуно чылажымат умылен кодыт гын, вараже тунемашышт куштылгырак лиеш. Кызыт эргына кандашымше классыште тунемеш, мӧҥгысӧ пашам шкежак ышта, иктаж полыш кӱлеш гын, ӧрдыжеш ом код.
А шкемын тунеммем годым иктаж-мом умылыде кодынам гын, авам полшен.
Яков ТИМОФЕЕВ, «Марий мыскара» группын авторжо:
– Умылтараш полшем, а урокшым шке ышташ тунемже манын туныктем. Чылажымат весын полышыж деч посна ыштен сеҥаш манын, туныктышым тӱткын колышташ темлем. Урокым ышташ шичмекыже иктаж-мом ок умыло гын, полшем.
Мӧҥгылан пуымо пашам ышташ ача-ава полшышаш огыл, а умылтарышаш веле, шонем. Тыге йоча чылажымат шкевуя ышташ вашкерак тунемеш. Чын але укежым тергыманак.
Тунеммем годым урокым шкеак эре ыштенам.
Марина ЗАВОЙСКИНА, И.С.Палантй лӱмеш тӱвыра да сымыктыш колледжын преподавательже, Самырык-влаклан Олык Ипай лӱмеш Кугыжаныш премийын лауреатше:
– «Шкеак урокым ыштышт манын, йоча-влакым изинекак туныктыман», – авамат тыге каласен. Тӱҥалтыште икшывылан ончыктен, умылтарен шогыман.
Кугурак эргым дене икымше да кокымшо класслаште урокым пырля ыштенна, а варажым мый тергенам веле. Кызыт ӱдырем икымше классыште тунемеш, мӧҥгысӧ пашам йӧратен ышта, иктаж нелылык лектеш гын, полышемлан эҥерта.
Алевтина БАЙКОВА ямдылен
Авторын фотожо
