«Все Все вместе» поро кумыл фонд Звенигово районысо Эсмекпляк селаште илыше 11 ияш Агата Яковлевалан протезым налаш окса дене полшаш йодеш. Чылаже 342 889 теҥге кӱлеш. Таче эр марте 138434 теҥгем погымо.
Ӱдыр жапыштыже да таза шочын, сайын вияҥын, но кум тылзашыж годым кугу азапыш логалын: йоча коляскысе москит сеткыш тул пижын, ойырлышо куэм, икшыве ӱмбак йоген, коваштыжым чот йӱлалтен.
Агаталан 12 операцийым ыштеныт: йӱлышӧ ужашлашке у коваштым пыштеныт, кок кидыштыжат парняже-шамычым пӱчкын кораҥденыт, пӱрнен кушмо верлам тӧремденыт, шӱргыжымат икмыняр гана саемденыт. Йоча мӧҥгыжӧ диагноз аршаш дене пӧртылын…
Туге гынат, Агата моло ӱдыр семынак илаш тунемеш. Кызыт визымше классыш коштеш, тыглай программе денак тунемеш, шкенжым шке онча, кок кидше дене ручкам кучен, возаш тырша, кочкеш, чия, кӱварым мушкеш, кочмыверыште дежуритла, школысо да районысо мероприятийлаште участвоватла – нимогай заданий деч вуйым ок шупш. Парняже-влак уке улыт гынат, пазлым, мозаикым пога, ӱстембал модыш да шахмат дене модеш. Телым тоя деч поснак ече дене коштеш, кеҥежым, рульым изиш кучен, велосипед дене кудалыштеш. А теве скакалке дене тӧрштылын огеш керт… Кид деч посна содыки чот йӧслана.
Ӱдырын ешыже верысе социальный службо деч ик гана веле огыл протезым ойыраш йодын. Туштыжо, чолга протезлан кидше чот пытен манын, кугыжаныш программе почеш косметическийым веле пуэныт. Йӧндымӧ «насадке-влак» дене икмыняр жап орланыме деч вара Агата нуным чийымым чарнен.
Кызыт икшывын пурла кидшылан тяговый манме протез моткочак кӱлеш. Кушмыж семын ӱдырын тупрӱдыжӧ коршташ тӱҥалын кертеш, молан манаш гын капкылже икшырымын кушкеш, а кидше – почеш кодынрак. Сандене кид йыжыҥым мыняр-гынат тарванылшым ышташ кӱлеш.
«Моторика» компанийын (Москва) специалистше-шамыч ӱдырын пурла кидшым протезироватлаш келшеныт. Пурлашкыже эше икмыняр операцийым ышташ кӱлеш.
Агата шуко шочшан еш гыч. Авашт ӱдыр-влакым онча, ачашт оласе маршруткышто водительлан ышта. Суртозан пашадарже да Агатан инвалидность шотышто пенсийже ешым кучаш гына ситат.
Протезым налаш полшымына дене Агаталан кидварням тарватылаш, сылне серышым возаш, кидым кормыжташ, аважын ӱпшым шыматаш йӧным ыштена. Шкат паледа, кидет уло гын, мом-гына от ыште!
Окса полышым интернетыш https://vsevsevmeste.ru/podopechnye/agata-jakovleva#help ссылке дене пурен ышташ лиеш.
М.ИВАНОВА ямдылен
